नवी मुंबई : नवी मुंबईतील डी. वाय. पाटील स्टेडियममध्ये उद्या दिल्ली कॅपिटल्स- लखनौ सुपर जायंटस्‌ या दोन संघांमध्ये लढत रंगणार आहे. यावेळी डेव्हिड वॉर्नर दिल्ली कॅपिटल्ससाठी खेळण्यास सज्ज झाला असून ॲनरीक नॉर्किया यानेही फिटनेस परीक्षा पास केली आहे. तसेच लखनौ सुपर जायंटस्‌साठी मार्कस स्टोयनिस हा अष्टपैलू खेळाडू खेळण्याची शक्यता आहे. एकूणच आंतरराष्ट्रीय क्रिकेटपटूंच्या आगमनानंतर आयपीएलच्या यंदाच्या मोसमाची चुरस आणखीन वाढणार आहे.

रिषभ पंतच्या नेतृत्वात मैदानात उतरणाऱ्या दिल्ली कॅपिटल्सला दोन लढतींपैकी एकामध्ये विजय मिळाला असून एका लढतीत त्यांना पराभवाला सामोरे जावे लागले आहे.

सलामीच्या लढतीत पराभवानजीक जात असलेल्या दिल्ली कॅपिटल्सला अक्षर पटेल व ललित यादव या जोडीने वाचवले. त्यानंतर गुजरात टायटन्सकडून त्यांना निसटता पराभव स्वीकारावा लागला. मात्र वॉर्नरच्या पुनरागमनामुळे या संघाचा सलामीचा प्रश्‍न सुटणार आहे. पृथ्वी शॉ त्याच्यासोबत सलामीला खेळेल. पण वॉर्नरच्या आगमनानंतर टीम सेईफर्ट आणि रोवमन पॉवेल यांच्यापैकी एकाला बाहेर बसवण्यात येऊ शकते. तसेच पंत, मनदीप सिंग यांनाही फलंदाजीत चमक दाखवावी लागणार आहे. अक्षर, ललित व शार्दूल ठाकूर या अष्टपैलू खेळाडूंकडूनही दिल्ली कॅपिटल्सला मोठ्या आशा आहेत.

विजयाच्या हॅट्ट्रिकसाठी सज्ज

के. एल. राहुलच्या नेतृत्वात पहिल्यांदाच आयपीएलमध्ये सहभागी झालेला लखनौ सुपर जायंटस्‌ हा संघ चमक दाखवत आहे. गुजरात टायटन्स संघाकडून हार सहन करावी लागल्यानंतर लखनौ सुपर जायंटस्‌ संघाने चेन्नई सुपरकिंग्ज व सनरायझर्स हैदराबाद या दोन संघांना पराभवाची धूळ चारली आहे. आता हा संघ विजयाच्या हॅट्ट्रिकसाठी सज्ज झाला आहे.

आयपीएल लढत

• लखनौ सुपर जायंटस्‌ - दिल्ली कॅपिटल्स

• डी. वाय. पाटील स्टेडियम, नवी मुंबई

• रात्री ७.३० वाजता