नवी मुंबई : गुजरात टायटन्सचा संघ पहिल्यांदाच आयपीएलमध्ये सहभागी होत आहे. मात्र हार्दिक पंड्याच्या नेतृत्वात मैदानात उतरणाऱ्या या संघाने पहिल्या तीन लढतींत प्रतिस्पर्ध्यांवर विजय मिळवत आपले वर्चस्व प्रस्थापित केले आहे. आता नवी मुंबईतील डी. वाय. पाटील स्टेडियममध्ये रंगणाऱ्या लढतीत गुजरात टायटन्ससमोर सनरायझर्स हैदराबादचे आव्हान असणार आहे.(IPL 2022 SRH vs GT Today Match)

केन विल्यमसनच्या या संघाने पहिल्या दोन लढतींतील पराभवानंतर रविवारी चेन्नई सुपरकिंग्जला हरवत गुणांचे खाते उघडले. हा संघ गुजरात टायटन्सचा विजयरथ रोखतो की पंड्याचा संघ विजयाचा चौकार मारतो हे पाहणे रंजक ठरणार आहे.

सलामी फलंदाज शुभमन गिल याने पंजाब किंग्जविरुद्धच्या लढतीत चमकदार खेळी साकारली. मॅथ्यू वेडचे संघातील स्थान कायम असेल. साई सुदर्शन, हार्दिक यांच्या खांद्यावर मधल्या फळीची जबाबदारी असेल. राहुल तेवतिया याने या मोसमात तीनपैकी २ लढतींमध्ये सामन्याला कलाटणी देणाऱ्या खेळी साकारल्या आहेत. त्यामुळे त्याला कमी लेखता येणार नाही.