IPL 2022 : सर्वाधिक पाच वेळा जेतेपद पटकावणारा मुंबई इंडियन्सचा संघ यंदाच्या आयपीएल मोसमात सपशेल अपयशी ठरतोय. सलग पाच लढतींमध्ये या संघाला पराभवाचा सामना करावा लागलाय. पहिल्या पाचही लढतींत विविध पर्यायांची चाचपणी करून बघितल्यानंतरही संघाला काही यश मिळेना. याच पार्श्वभूमीवर आता मुंबई इंडियन्सचा संघ आज लखनौ सुपर जायंटस्‌ संघाशी दोन हात करील तेव्हा या संघासमोर अचूक संघ निवडीचा पेच असणार आहे. कोणत्या ११ खेळाडूंना संघात स्थान द्यायचे, हा यक्षप्रश्‍न त्यांच्यासमोर उभा ठाकणार आहे.

कर्णधार रोहित शर्माला फलंदाजीत अपयश येत आहे. सुरुवातीच्या लढतींमध्ये आक्रमक फलंदाजी करीत धावा करणाऱ्या इशान किशनकडूनही मागील काही लढतींत निराशा होत आहे. कायरॉन पोलार्डलाही प्रतिस्पर्ध्यांवर वर्चस्व गाजवता आलेले नाही. तिलक वर्मा व सूर्यकुमार यादव हे दोन फलंदाज छान कामगिरी करीत आहेत, पण या दोघांमुळे संघाला काही विजय मिळवता आलेला नाही. डीवाल्ड ब्रेव्हीस या युवा खेळाडूंकडून अपेक्षा आहेत. पण तो एकाहाती सामना फिरवून देऊ शकेल, अशी इच्छा बाळगणे चुकीचे ठरील. त्याच्याकडे अनुभवाची कमतरता आहे. टीम डेव्हीड याला पुन्हा संघात स्थान दिले जाऊ शकते.

खेळाडूंचा फॉर्म कायम

लखनौ सुपर जायंटस्‌ या संघातील बहुतांशी खेळाडू फॉर्ममध्ये आहेत. कर्णधार के. एल. राहुल, दीपक हुडा, आयुष बदोनी, कृणाल पंड्या, अवेश खान, रवी बिश्‍नोई हे भारतीय खेळाडू जबरदस्त फॉर्ममध्ये आहेत. या संघाने ५ सामन्यांमधून तीनमध्ये विजय मिळवत ६ गुणांची कमाई केली आहे. उद्या हा संघ चौथ्या विजयासाठी प्रयत्न करताना दिसेल.

संघातील परदेशी खेळाडूंबाबत संभ्रम

लखनौ सुपर जायंटस्‌ संघासाठी परदेशी खेळाडूंची निवड करण्याबाबत संभ्रम असणार आहे. या संघात क्वींटोन डी कॉक, जेसन होल्डर, मार्कस स्टोयनीस व दुशमंता चमीरा या चार परदेशी खेळाडूंना प्राधान्य दिले जाते. पण संघाचा मेंटॉर गौतम गंभीर उद्याच्या लढतीत कोणत्या परदेशी खेळाडूंना खेळवायचे याबाबत कोणता निर्णय घेतो हे पाहणे रंजक ठरणार आहे. जेसन होल्डर व मार्कस स्टोयनीस यांच्यापैकी एकाला वगळून इविन लुईस याला संघात स्थान देण्यात येण्याची शक्यता नाकारता येत नाही. त्याच्या समावेशामुळे फलंदाजी भक्कम होईल.