लखनौ : धावांचे पाठबळ भलेही कमी असेल, परंतु अखेरपर्यंत लढण्याची जिद्द कायम ठेवली तर हरलेला सामनाही जिंकता येत असतो हे गतविजेत्या गुजरात संघाने दाखवून दिले, लखनौविरुद्धचा सामना त्यांनी सात धावांनी जिंकला.

गुजरातने आजच्या सामन्यात कशाबशा ६ बाद १३५ धावा केल्या होत्या. या आव्हानासमोर लखनौने अखेरच्या षटकापर्यंत ३ बाद १२४ धावा केल्या होत्या. विजयासाठी त्यांना अखेरच्या सहा चेंडूत १२ धावांची गरज होती.

कर्णधार केएल राहुल ६८ धावांवर खेळत होता. यातील पहिल्या चेंडूवर राहुलने दोन धावाही काढल्या, परंतु पुढच्या चार चेंडूवर चार फलंदाज बाद झाले आणि त्यांनी जिंकण्याची सुवर्णसंधी असलेला सामना गमावला.

केएल राहुल आणि मार्कस स्टॉयनिस आक्रमक फटके मारण्याच्या प्रयत्नांत बाद झाले. त्यानंतर आयुष बदोनी आणि दीपक हुडा दुहेरी धाव घेण्याच्या प्रयत्नात धावचीत झाले. तेथेच सामन्याचा निकाल स्पष्ट झाला.

राहुल आणि मायर्स यांनी ६.३ षटकांत ५५ धावांची सलामी देऊनही आणि सलामीला आलेला राहुल अखेरच्या षटकापर्यंत नाबाद असूनही त्यांना सामना जिंकता आला नाही. गुजरातसाठी मोहित शर्मा पुन्हा एकदा मॅचविनर ठरला.

त्याअगोदर १९ व्या षटकात मोहम्मद शमीने पाचच धावा दिल्या होत्या.तत्पूर्वी गुजरातची फलंदाजी सुरुवातीला ढेपाळली होती. शुभमन गिल शून्यावर बाद झाल्यावर वृद्धिमन साहा आणि तिसऱ्या क्रमांकावर फलंदाजीस आलेला कर्णधार हार्दिक पंड्या यांनी ६८ धावांची भागीदारी केली.

गुजरातची मधली फळीही फार काही चमक दाखवू शकली नाही, परंतु अखेरपर्यंत मैदानात राहणाऱ्या हार्दिकने ६६ धावा केल्यामुळे गुजरातला जेमतेम १३५ धावा करता आल्या.

संक्षिप्त धावफलक

गुजरात २० षटकांत ६ बाद १३५ (वृद्धिमन साहा ४७- ३७ चेंडू, ६ चौकार, हार्दिक पंड्या ६६- ५० चेंडू, २ चौकार, ४ षटकार, क्रृणाल पंड्या ४-०-१६-२, मार्कस स्टॉयनिस ३-०-२०-२, अमित मिश्रा २-०-९-१) वि. वि. लखनौ ः २० षटकांत ७ बाद १२८ (केएल राहुल ६८- ६१ चेंडू, ८ चौकार, केली मायर्स २४- १९ चेंडू, २ चौकार, १ षटकार, कृणाल पंड्या २३- २३ चेंडू, २ चौकार, १ षटकार, रशीद खान ४-०-३३-१, मोहित शर्मा ३-०-१७-२, नूर अहमद ४-०१८-२)