GT vs CSK MS Dhoni IPL 2023 : आयपीएल 2023 चा पहिला क्वालिफायर सामना 23 मे रोजी चेन्नईच्या चेपॉक स्टेडियमवर गुजरात टायटन्स आणि चेन्नई सुपर किंग्ज यांच्यात खेळला गेला. चेन्नईने हा सामना 15 धावांनी जिंकला आणि आयपीएल 2023 च्या अंतिम फेरीत पोहोचणारा तो पहिला संघ ठरला. चेन्नई सुपर किंग्ज 10 व्यांदा इंडियन प्रीमियर लीगच्या अंतिम फेरीत पोहोचल्यानंतर करिष्माई कर्णधार महेंद्रसिंग धोनी पुढील हंगामात खेळणार की नाही यावर मोठे वक्तव्य केले.

आयपीएल क्वालिफायरच्या पहिल्या सामन्यात गुजरात टायटन्सवर 15 धावांनी विजय मिळवल्यानंतर जेव्हा समालोचक हर्षा भोगले यांनी धोनीला विचारले की तो पुन्हा येथे (चेन्नई) खेळणार का? धोनी म्हणाला, मला माहित नाही, माझ्याकडे निर्णय घेण्यासाठी आठ-नऊ महिने आहेत. माझ्याकडे विचार करायला पुरेसा वेळ आहे, त्यामुळे मी आत्ताच याबद्दल विचार करून डोकेदुखी वाढू करू इच्छित नाही.

चेन्नईला चार वेळा चॅम्पियन बनवणारा कर्णधार म्हणाला, मग ते चेन्नईसाठी मैदानावर खेळणे असो किंवा संघाबाहेर बसणे असो, मी चेन्नईसोबत राहणे पसंत करेन. डिसेंबर मध्ये पुढील आयपीएल लिलाव आहे. तेव्हा विचार करू. मी या वर्षी जानेवारीपासून घराबाहेर आहे, मार्चपासून सराव करतोय.

धोनीने या सीझनमध्ये असे काही संकेत दिले आहेत, ज्यामुळे तो येत्या काही वर्षांतही आयपीएलमध्ये खेळताना दिसणार असल्याचे दिसते. पहिल्या क्वालिफायर सामन्यात प्रथम फलंदाजी करताना CSK संघाने 20 षटकात 7 गडी गमावून 172 धावा केल्या आणि गुजरातसमोर 173 धावांचे लक्ष्य ठेवले. 173 धावांच्या लक्ष्याचा पाठलाग करताना गुजरात टायटन्सची फलंदाजी पूर्णपणे फ्लॉप ठरली. 20 षटकात 157 धावा करून तो ऑलआऊट झाला आणि 15 धावांनी सामना गमावला.