नवी दिल्ली - भारताचे माजी कर्णधार सौरव गांगुली व सध्याचा स्टार फलंदाज विराट कोहली यांच्यामधील संबंध सलोख्याचे नाहीत. दोघांमध्ये वितुष्टता आहे. अशी चर्चा रंगू लागली असतानाच दिल्ली कॅपिटल्स - रॉयल चॅलेंजर्स बंगळूर यांच्यामध्ये शनिवारी झालेली आयपीएल लढत पार पडल्यानंतर दोघांनी हस्तांदोलन केले.

काही वेळ चर्चाही केली. याआधी घडलेल्या घटनांना दोघांनाही मागे टाकल्याचे देहबोलीवरून दिसून येत होते. दरम्यान, गांगुली बीसीसीआयचे अध्यक्ष असताना विराट याला भारतीय संघाच्या कर्णधारपदावरून पायउतार होण्यास दबाव टाकत होते, अशी चर्चा होती.

कोहली यानेही पत्रकार परिषदेत याबाबत स्पष्ट मत व्यक्त केले होते. या घटनेमुळे दोघांमध्ये वाद असल्याचे समोर आले होते. तसेच दिल्ली कॅपिटल्स - रॉयल चॅलेंजर्स बंगळूर यांच्यामधील यंदाच्या आयपीएल मोसमातील पहिल्या फेरीच्या लढतीनंतर दोघांनीही एकमेकांना हात मिळवले नव्हते. त्यामुळे आणखीनच चर्चेला उधाण आले होते.