SRH vs RR, Qualifier 2: इंडियन प्रीमियर लीग 2024 स्पर्धेत दुसरा क्वालिफायर सामना शुक्रवारी (२४ मे) खेळवला जाणार आहे. हा सामना सनरायझर्स हैदराबाद विरुद्ध राजस्थान रॉयल्स संघात होणार आहे. चेन्नईतील एमए चिदंबरम स्टेडियम (चेपॉक) स्टेडियमवर संध्याकाळी 7.30 वाजता या सामन्याला सुरुवात होईल.

अंतिम सामन्याचे तिकीट मिळवण्यासाठी हा सामना दोन्ही संघांसाठी महत्त्वाचा आहे. या सामन्यात विजय मिळवणारा संघ अंतिम सामन्यात प्रवेश करणार आहे.

अशात भारतातील अनेक ठिकाणी सध्या मान्सूनपूर्व पाऊस कोसळताना दिसत आहे. यापूर्वीही आयपीएलचे काही सामनेही पावसामुळे रद्द झाले आहेत. त्यामुळे चेन्नईत शुक्रवारी कसे वातावरण असेल, असा प्रश्न अनेकांना पडला आहे.

हवामान अंदाज

दरम्यान, हवामान अंदाजानुसार चेन्नईमध्ये पावसाच्या हलक्या सरी बरसण्याची शक्यता आहे. परंतु, पावसाचा मोठा अडथळा सामन्यात येण्याची शक्यता अत्यंत कमी आहे. पण चेन्नईत शुक्रवारी बऱ्यापैकी ढगाळ वातावरण राहण्याती शक्यता आहे.

तरी शुक्रवारी सामना पावसाचा अडथळा आला, तरी दोन तास पंच सामना सुरू होण्याची प्रतिक्षा करू शकतात. तसेच कमीत कमी 5-5 षटकांचा सामना होणे गरजेचे आहे.

जर सामना शुक्रवारी होऊ शकला नाही, तर शनिवार हा राखीव दिवस देखील असणार आहे. तसेच अखेरीस 5-5 षटकांचाही सामना न झाल्यास सुपर ओव्हरने सामन्याचा निकाल काढण्याचा प्रयत्न होईल.

मात्र काही शक्य झाले नाही आणि सामना रद्दच करावा लागला, तर पाँइंट्स टेबसमध्ये दुसऱ्या क्रमांकावर असलेल्या सनरायझर्स हैदराबादला अंतिम सामन्यात प्रवेश मिळेल.

आमने-सामने आकडेवारी

सनरायझर्स हैदराबाद आणि राजस्थान रॉयल्स संघात आत्तापर्यंत 19 सामने खेळवण्यात आले असून हैदराबादने 10 सामने जिंकलेत, तर राजस्थानने 9 सामने जिंकले आहेत.

गेल्या 6 सामन्यातील इतिहास पाहता ३ सामने राजस्थानने आणि 3 सामने हैदराबादने जिंकले आहेत. आयपीएल 2024 मध्ये या दोन संघात एकच सामना झाला होता, ज्यात हैदराबादने अवघ्या 1 धावेने रोमांचक विजय मिळवलेला.