बंगळूर - लखनौने सोमवारी बंगळूरवर एक विकेट राखून सनसनाटी विजयाला गवसणी घातली. या लढतीत मार्कस स्टॉयनीस, निकोलस पुरन या फलंदाजांनी आक्रम फलंदाजी केली आणि लखनौला थरारक विजय मिळवून दिला, पण कर्णधार के. एल. राहुल याने या लढतीत २० चेंडूंमध्ये १८ धावा केल्या. लढतीनंतरच्या पत्रकार परिषदेत संथ फलंदाजीबद्दल राहुल म्हणाला, एका बाजूने विकेट गमावले होते, त्यामुळे दुसऱ्या बाजूने मला खेळपट्टीवर टिकून राहायचे होते. याच कारणामुळे संथ फलंदाजी केली.

लखनौ येथील खेळपट्टी फलंदाजांसाठी आव्हानात्मक आहे. या स्टेडियमवर आम्ही दोन लढती खेळल्या आहेत. या खेळपट्टीवर धावांचा निकष लावता येणार नाही. बंगळूरविरुद्धच्या लढतीत आम्ही विकेट गमावले होते. त्या वेळी सावध फलंदाजी करणे गरजेचे होते. निकोलस पुरन याच्यासोबत आणखी काळ फलंदाजी केली असती, तर आधीच आम्ही विजय मिळवला असता. तसेच जास्त धावा केल्या असत्या, तर माझा फलंदाजी स्ट्राईक रेटही वाढला असता, असे राहुल आवर्जून सांगतो.

स्टॉयनीस, पुरनमुळे विजय साकारला

राहुलने याप्रसंगी मार्कस स्टॉयनिस व निकोलस पुरन यांच्या आक्रमक फलंदाजीचे कौतुक केले. बंगळूरातील चिन्नास्वामी स्टेडियमवर थरारक लढती पार पडल्या आहेत. येथे सर्वाधिक वेळा अखेरच्या षटकात निकाल लागतो. मार्कस स्टॉयनीस व निकोलस पुरन यांच्या अद्‌भुत व आक्रमक फलंदाजीमुळे लखनौला विजय साकारता आला आणि दोन महत्त्वाच्या गुणांची कमाई करता आली, असेही राहुल स्पष्ट सांगतो.

टी-२० क्रिकेटमध्ये पाच, सहा व सात या क्रमांकावर फलंदाजी करणारे फलंदाज सामन्याचा नूर बदलू शकतात. याच क्रमांकावरील फलंदाजांच्या कामगिरीवर लढतीचा निकाल क्षणार्धात बदलतो. याचमुळे आम्ही या क्रमांकावर फलंदाजी करण्यासाठी मार्कस स्टॉयनीस, निकालस पुरन व आयुष बदोनी यांची निवड केली आहे.

- के. एल. राहुल, कर्णधार, लखनौ सुपर जायंटस्