कोलकता : विजय शंकर आणि डेव्हिड मिलर यांनी ऐन मोक्याच्या क्षणी टॉप गीअरमध्ये फलंदाजी केल्यामुळे गतविजेत्या गुजरातने कोलकता नाईट रायडर्सचा सात विकेटने पराभव करून सलग तिसरा विजय मिळवला आणि गुणतक्त्यात पुन्हा आघाडी घेतली. गुजरातचा हा सहावा विजय आहे.

कोलकता संघाला ७ बाद १७९ धावांवर रोखल्यानंतर गुजरात संघाने हे आव्हान १७.५ षटकांत पार केले. ४९ धावा करणारा शुभमन गिल बाद झाला तेव्हा कोलकता संघाची ३ बाद ९३ अशी स्थिती होती. चौथ्या क्रमांकावर फलंदाजी करणारा विजय शंकर त्या वेळी सावध फलंदाजी करत होता.

अखेरच्या ३६ चेंडूत विजयासाठी ६९ धावांची गरज असताना शंकर आणि मिलर यांनी अचानक पवित्रा बदलला. चौकार, षटकारांची आतषबाजी करून त्यांनी १३ चेंडू शिल्लक असतानाच विजयाचा तिलक लावला.

पावसाचा व्यत्यय आला असला तरी त्याचा परिणाम खेळपट्टीवर झाला नाही. खरे तर या सामन्याची सुरुवात दोन्ही संघांसाठी फायदेशीर होती. एकीकडे गुजरातचे गोलंदाज कोलकता संघाच्या विकेट काढत होते, पण त्याच वेळी कोलकताचा सलामीवीर रेहमनुल्ल गुरबाझ धडाकेबाज फलंदाजी करत होता. त्याच्या हल्याचा फटका हार्दिक पंड्या आणि रशीद खान यांना सहन करावा लागला. त्यामुळे कोलकताची सुरुवात १० षटकांत आठ धावांच्या सरासरीची होती.

व्यंकटेश अय्यर, नितीश राणा अपयशी ठरल्यानंतर आंद्रे रसेलने आपला हिसका दाखवला.

संक्षिप्त धावफलक

कोलकता ः २० षटकांत ७ बाद १७९ (रेहमनुल्ला गुरबाझ ८१- ३९ चेंडू, ५ चौकार, ७ षटकार, आंद्रे रसेल ३४- १९ चेंडू, २ चौकार, ३ षटकार, मोहम्मद शमी ४-०-३३-३, जॉश लिटल ४-०-२५-२, नूर अहमद ४-०-२१-२) पराभूत वि. गुजरात ः १७.५ षटकांत ३ बाद १८० (शुभमन गिल ४९- ३५ चेंडू, ७ चौकार, हार्दिक पंड्या २६- २० चेंडू, २ चौकार, १ षटकार, विजय शंकर नाबाद ५१-२४ चेंडू, २ चौकार, ५ षटकार, डेव्हिड मिलर नाबाद ३२- १८ चेंडू, २ चौकार, २ षटकार, हर्षित राणा ३-०-२५-१)