हैदराबाद : सनरायझर्स हैदराबादला सोमवारी झालेल्या आयपीएल लढतीत दिल्ली कॅपिटल्सकडून सात धावांनी पराभव पत्करावा लागला. १४५ या माफक धावांचा पाठलाग करणे सनरायझर्स हैदराबादला डोईजड गेले. या पराभवानंतर निराश झालेला सनरायझर्स हैदराबादचा मुख्य प्रशिक्षक ब्रायन लारा याने फलंदाजांवर टीका केली. हैदराबादच्या फलंदाजांनी पॉवरप्लेमध्ये आक्रमक फलंदाजी करायला हवी, असे स्पष्ट अन्‌ परखड मत त्याने व्यक्त केले.

लारा पुढे म्हणाला, हैदराबादच्या गोलंदाजांनी आपली कामगिरी चोख बजावली होती. फलंदाजांना जबाबदारी ओळखून खेळ करता आला नाही. खरेतर १४५ धावांचे आव्हान अगदी आरामात करायला हवे होते, असे त्याला वाटते.

हैदराबादच्या या पराभवानंतर लाराने खेळपट्टीलाही दोष दिला नाही. तो म्हणाला, खेळपट्टी व्हीलन नव्हती. आमच्या फलंदाजांनी सुरुवातीपासूनच आक्रमक खेळ करायला हवा होता. पॉवरप्लेमध्येही संथ फलंदाजी केली.

मधल्या षटकांमध्ये प्रतिस्पर्धी संघातील गोलंदाजांना विकेट मिळाले. याचा फायदा त्यांना झाला. तसेच अखेरच्या षटकांमध्ये इशांत शर्मा, मुकेश व ॲनरीक नॉर्खिया या व्यावसायिक गोलंदाजांनी अव्वल दर्जाची कामगिरी केली, असे लारा स्पष्ट सांगतो.

दिल्लीचा डावखुरा फिरकी गोलंदाज कुलदीप यादव याप्रसंगी म्हणाला, पहिल्या पाच लढतींमध्ये आमचा पराभव झाला. पण मागील दोन लढतींमध्ये आम्ही विजय मिळवला आहे. असे कुलदीप आवर्जून म्हणाला.