IPL 2024 Matches Rescheduled : यंदा पण आयपीएल 2024 चा थरार भारतात अतिशय भव्य पद्धतीने खेळवला जात आहे. चाहत्यांना दररोज रोमांचक सामने पाहायला मिळत आहेत. आधी बीसीसीआयने आयपीएल 2024 च्या पहिल्या टप्प्याचे वेळापत्रक जाहीर केले होते.

त्यानंतर सार्वत्रिक निवडणुका जाहीर झाल्यानंतर दुसऱ्या टप्प्याचे वेळापत्रकही जाहीर करण्यात आले. पण बीसीसीआयने आता आयपीएल 2024 च्या मधल्या वेळापत्रकात बदल केला आहे. दोन सामन्यांच्या तारखांमध्ये बदल करण्यात आला आहे.

कोलकाता नाईट रायडर्स आणि राजस्थान रॉयल्स यांच्यातील सामना 17 एप्रिल 2024 रोजी कोलकात्याच्या ईडन गार्डन्सवर खेळवला जाणार होता, परंतु आता हा सामना 16 एप्रिल 2024 रोजी होणार आहे.

याशिवाय गुजरात टायटन्स आणि दिल्ली कॅपिटल्स यांच्यातील सामना 16 एप्रिल 2024 रोजी अहमदाबादच्या नरेंद्र मोदी स्टेडियमवर होणार होता, जो आता 17 एप्रिल रोजी खेळवला जाईल. या दोन सामन्यांमध्येच बदल झाले आहेत.

आयपीएल 2024 मध्ये 10 संघ सहभागी होत आहेत. यावेळी अहमदाबाद आणि चेन्नईमध्ये क्वालिफायर सामने खेळवले जातील. अहमदाबादच्या नरेंद्र मोदी स्टेडियमवर पहिला क्वालिफायर सामना खेळवला जाईल.

तर 22 मे रोजी एलिमिनेटर सामना याच मैदानावर होणार आहे. तर दुसरा क्वालिफायर 24 मे रोजी चेन्नईच्या एमए चिदंबरम स्टेडियमवर खेळवला जाईल. 26 मे रोजी चेन्नईच्या मैदानावर अंतिम सामना होणार आहे.