IPL 2024 Final, KKR vs SRH: इंडियन प्रीमियर लीग 2024 स्पर्धेचा अंतिम सामना कोलकाता नाईट रायडर्स आणि सनरायझर्स हैदराबाद संघात रंगणार आहे. रविवारी चेन्नईतील एमए चिदंबरम स्टेडियमवर (चेपॉक) खेळवला जाणार आहे.

या सामन्यासाठी कोलकाता आणि हैदराबाद आमने-सामने येण्यापूर्वी दोन्ही संघांच्या कर्णधारांमध्ये मात्र शा‍ब्दिक युद्ध रंगल्याचे दिसले. कोलकाताचा कर्णधार श्रेयस अय्यर आणि हैदराबादचा कर्णधार पॅट कमिन्स हे दोघेही अंतिम सामन्यापूर्वी फोटोशूटसाठी आणि पत्रकार परिषदेवेळी भेटले होते.

दरम्यान, श्रेयसने कमिन्सला एक संदेश दिला आहे. त्याने म्हटले, 'पॅट, मला सांगायचे आहे की पहिली गोष्ट म्हणजे तू यंदाच्या हंगामात हैदराबादचे शानदार नेतृत्व केले. पण आम्ही या हंगामात तुमच्यासमोर कठीण आव्हाने ठेवली.'

'मला तुला फक्त याची आठवण करून द्यायची आहे की तुम्ही याच प्रतिस्पर्ध्यांविरुद्ध फक्त वेगळ्या मैदानात खेळणार आहात. रोमांचक अंतिम सामना होईल, सर्वोत्तम कामगिरी करणारा संघ जिंकेल, सर्वोत्तम म्हणजे आमचा.'

त्यावर कमिन्स म्हणाला, 'श्रेयस तू दिलेल्या संदेशासाठी थँक्यू. तू सुद्धा चांगले आणि स्वॅगने नेतृत्व केले. पण मी या मैदानात आमच्या शानदार विजयाव्यतिरिक्त दुसरा विचार करत नाहीये. मला माहित आहे केकेआर संघ काय अपेक्षा करत आहे.'

'तू विचार करत असशील की तुम्ही आम्हाला या हंगामात कठीण आव्हान दिले, पण मी याची खात्री देतो की अंतिम सामन्यासाठी सर्वोत्तम हैदराबाद संघानं राखून ठेवलंय.'

दरम्यान, यंदाच्या हंगामात कोलकाता आणि हैदराबाद संघात दोन सामने झाले आहेत. पहिला सामना साखळी फेरीत झाला होता, ज्यामध्ये कोलकाताने 4 धावांनी रोमांचक विजय मिळवलेला. दुसरा सामना क्वालिफायर-1 मध्ये झालेला. या सामन्यातही कोलकातानेच 8 विकेट्सने दणदणीत विजय मिळवला होता.

या दोन संघातील एकूण आमने-सामने आकडेवारीबद्दल सांगायचे झाले तर हैदराबाद आणि कोलकाता आत्तापर्यंत 27 वेळा आमने-सामने आले आहेत. यातील 9 सामन्यात हैदराबादने विजय मिळवला आहे, तर 18 सामने कोलकाताने जिंकले आहेत.