IPL 2023 Mark Wood : गेल्या हंगामात आयपीएलमध्ये पदार्पण करणाऱ्या लखनऊ सुपर जायंट्सच्या अडचणी यंदा कमी होण्याचे नाव घेत नाहीत. संघाचा कर्णधार केएल राहुल आणि वेगवान गोलंदाज जयदेव उनाडकट दुखापतीमुळे 16 व्या हंगामाततून आधीच बाहेर गेले आहेत.

यानंतर आता एलएसजीला आणखी एक मोठा धक्का बसला आहे. लखनऊ सुपर जायंट्सचा प्रमुख इंग्लिश गोलंदाज मार्क वुड वैयक्तिक कारणांमुळे मायदेशी परतला आहे. याची माहिती फ्रँचायझीने सोशल मीडियाच्या माध्यमातून दिली आहे.

आता आयपीएल 2023 च्या प्लेऑफ सामन्यांना काही दिवस उरले आहेत. अशा स्थितीत हे संघ प्लेऑफमध्ये स्थान मिळवण्याच्या शर्यतीत व्यस्त आहेत. दरम्यान लखनौ सुपर जायंट्सचा घातक वेगवान गोलंदाज मार्क वुड संघ सोडून मायदेशी परतला आहे.

लखनऊ सुपर जायंट्सने त्यांच्या अधिकृत ट्विटर अकाऊंटवर एक व्हिडिओ शेअर केला आहे, ज्यामध्ये वुड म्हणत आहे की, माझ्या मुलीच्या जन्मानिमित्त मला घरी जावे लागेल. हे एक चांगले कारण आहे ज्यासाठी मी जात आहे. आशा आहे की मी लवकरच पुनरागमन करेन आणि संघासाठी उर्वरित सामन्यांमध्ये खेळताना दिसेल.

संघाबाबत वुड पुढे म्हणाले की, एलएसजी हा एक उत्तम संघ आहे. मला हा संघ आवडतो. कोचिंग स्टाफही खूप चांगला आहे. मात्र मी फक्त चार सामने खेळलो आणि त्यात काही विकेट्स घेण्यात मला यश आले.

मार्क वुडने चालू हंगामात चांगली कामगिरी केली. त्याला केवळ 4 सामने खेळण्याची संधी मिळाली असली, तरी त्याने इतक्याच सामन्यांमध्ये 11 विकेट घेतल्या आहेत. दिल्ली कॅपिटल्सविरुद्ध खेळल्या गेलेल्या सामन्यात वुडने 5 बळी घेत दिल्लीच्या फलंदाजीचे कंबरडे मोडले होते. त्याचे जाणे संघासाठी निश्चितच मोठा धक्का आहे आणि संघाला त्याची उणीव नक्कीच भासणार आहे.