IPL 2022 : चेन्नई सुपर किंग्ज (Chennai Super Kings) आणि पंजाब किंग्ज (Punjab Kings) या दोन किंग्जमध्ये आज फाईट होत आहे. चेन्नईसाठी आजचा सामना हा महत्वाचा आहे. कारण गेल्या दोन सामन्यात चेन्नईला पराभवाचा सामना करावा लागला. चेन्नईने नाणेफेक जिंकून गोलंदाजी करण्याचा निर्णय घेतला. चेन्नईने पंजाबचे दोन फलंदाज पहिल्या दोन षटकातच बाद करत चांगली सुरुवात केली. दरम्यान, पंजाबचा फलंदाज भानुका राजपक्षे (Bhanuka Rajapaksa) धावबाद (Run Out) झालेला व्हिडिओ सध्या सोशल मीडियावर व्हायरल होत आहे. राजपक्षेला धावबाद करण्यात महेंद्रसिंह धोनीने (MS Dhoni) मोठी भुमिका बजावली आहे.

महेंद्रसिंह धोनीने आयपीएलचा 15 वा हंगाम सुरू होण्यापूर्वी दोन दिवस आधीच सीएसकेच्या कर्णधारपदाचा राजीनामा दिला. त्यानंतर धोनी आता आयपीएलमधून निवृत्त होणार अशी चर्चा सुरू झाली. त्याच्या वाढच्या वयाबद्दल देखील अनेक कमेंट येत होत्या. मात्र धोनीने फलंदाजीत धडाक्यात सुरुवात करत पहिल्याच सामन्यात अर्धशतक झळकावले. त्यानंतर आज पंजाब विरूद्धच्या सामन्यात विकेट मागे आपला जुना जलवा पुन्हा दाखवून दिला.

राजपक्षेच्या रनाऊटचा व्हिडिओ पाहिला तर लक्षात येईल की ज्यावेळी राजपक्षे आणि शिखर धवनमध्ये चोरटी धाव घेण्याच्या प्रयत्नात गोंधळ निर्माण झाला. याचा फायदा उचलत गोलंदाजी करणाऱ्या ब्रोव्होने चेंडू विकेटकिपर एंन्डला थ्रो केला. मात्र थ्रो फारसा अचूक नव्हता. तेवढ्यात धोनीने जोरात धाव घेत तो चेंडू पकडला आणि लांबूनच स्टंपवर टाकला. धोनीने दाखवलेल्या चपळाईमुळे राजपक्षे धावबाद झाला.