जयपूर : राजस्थान रॉयल्सने गुरुवारी चेन्नई सुपरकिंग्सचा विजयरथ रोखला. यशस्वी जयस्वालची ७७ धावांची खेळी आणि ॲडम झाम्पा (३/२२) व रवीचंद्रन अश्‍विन (२/३५) यांच्या प्रभावी गोलंदाजीच्या जोरावर राजस्थान रॉयल्सने ३२ धावांनी विजयाला गवसणी घातली.

राजस्थानकडून मिळालेल्या २०३ धावांच्या आव्हानाचा पाठलाग करणाऱ्या चेन्नईची सुरुवात संथ झाली. ॠतुराज गायकवाड व डेव्होन कॉनवे या जोडीने ४२ धावांची भागीदारी केली. पण कॉनवेला मोठे फटके खेळता आले नाही. कॉनवे बाद झाल्यावर ॠतुराज व अजिंक्य रहाणे ही जोडी चेन्नईसाठी मोलाची कामगिरी करील असे वाटत असतानाच दोघेही बाद झाले. चेन्नईने पाच धावांच्या अंतरात तीन विकेट गमावल्या. नंतर शिवम दुबे (५२ धावा), मोईन अली (२३ धावा) व रवींद्र जडेजा (नाबाद २३ धावा) यांच्या प्रयत्नांना यश मिळाले नाही.

दरम्यान, याआधी राजस्थानने नाणेफेक जिंकून प्रथम फलंदाजी करण्याचा निर्णय घेतला. यशस्वी जयस्वाल व जॉस बटलर या सलामी जोडीने आपला फलंदाजी फॉर्म कायम राखला. दोघांनी ८६ धावांची भागीदारी केली. नंतर यशस्वीने ४३ चेंडूंमध्ये ७७ धावांची मौल्यवान खेळी केली. या खेळीत त्याने ८ चौकार व ४ षटकार मारले.

तो मोठी खेळी करणार असे वाटत असतानाच तुषारने देशपांडेने त्याला तंबूत पाठवले. ध्रुव जुरेल व देवदत्त पडीक्कल या जोडीने अखेरच्या षटकांमध्ये आक्रमक फलंदाजी करीत राजस्थानला २०२ धावांपर्यंत नेले. जुरेल याने ३ चौकार व २ षटकारांसह ३४ धावांची खेळी केली. तो धावचीत बाद झाला. देवदत्तने १३ चेंडूंमध्ये नाबाद २७ धावांची खेळी केली. या खेळीत ५ चौकारांचा समावेश होता.

संक्षिप्त धावफलक ः राजस्थान रॉयल्स २० षटकांत ५ बाद २०२ धावा (यशस्वी जयस्वाल ७७, ध्रुव जुरेल ३४, तुषार देशपांडे २/४२) विजयी वि. चेन्नई सुपरकिंग्स २० षटकांत ६ बाद १७० धावा (ॠतुराज गायकवाड ४७, शिवम दुबे ५२, रवींद्र जडेजा नाबाद २३, ॲडम झाम्पा ३/२२, रवीचंद्रन अश्‍विन २/३५).