IPL 2023 : चेन्नई सुपरकिंग्सने मागील तीन लढतींमध्ये विजय मिळवून प्ले ऑफच्या दिशेने वाटचाल केली आहे. चेन्नई सुपरकिंग्ससमोर आज होणाऱ्या आयपीएल लढतीत राजस्थान रॉयल्सचे आव्हान असणार आहे. राजस्थान रॉयल्सला मागील दोन लढतींत पराभवाचा सामना करावा लागला आहे. घरच्या मैदानावर होणाऱ्या लढतीत विजयी पुनरागमन करण्यासाठी ते प्रयत्नशील असतील.

संजू सॅमसन नेतृत्व करीत असलेला राजस्थान रॉयल्सचा संघ सध्या गुणतालिकेत तिसऱ्या स्थानावर (मंगळवार रात्रीपर्यंतच्या लढतीपर्यंत) आहे. अव्वल स्थानावर असलेल्या चेन्नई सुपरकिंग्सवर वर्चस्व गाजवणे त्यांच्यासाठी सोपे नसणार आहे.

डेव्होन कॉनवे (३१४ धावा), ॠतुराज गायकवाड (२७० धावा), अजिंक्य रहाणे (२०९ धावा) व शिवम दुबे (१८४ धावा) या चार फलंदाजांनी आतापर्यंत उल्लेखनीय कामगिरी केली आहे.चेन्नईच्या गोलंदाजी विभागात अनुभवाची कमतरता आहे. रवींद्र जडेजा व मोईन अली वगळता इतर गोलंदाजांकडे अनुभव नाही. गोलंदाजी प्रशिक्षक ड्वेन ब्राव्हो यांच्या मार्गदर्शनात तुषार देशपांडे व आकाश सिंग यांचा खेळ बहरत आहे.

राजस्थानच्या संघाने पहिल्या पाचपैकी चार लढतींमध्ये विजय मिळवून आपले वर्चस्व प्रस्थापित केले होते. पण त्यानंतर सलग दोन लढतींमध्ये त्यांना हार पत्करावी लागली.