IPL 2021: स्पर्धेचा दुसरा टप्पा रविवारपासून दुबईत सुरू झाला. पहिल्या सामन्यात चेन्नईने मुंबईला २० धावांनी पराभूत केले. त्यानंतर सोमवारी विराट कोहलीचा बंगळुरू संघ कोलकाताविरूद्ध मैदानात उभा ठाकला. विराटने मैदानात पाऊल ठेवताच एक मोठा विक्रम केला. महेंद्रसिंग धोनी, सुरेश रैना, रोहित शर्मा ही IPL मधील बडी नावं आहेत. या खेळाडूंनाही जे शक्य झालं नाही, तो महाविक्रम विराटने सोमवारच्या सामन्यात केला.

विराट कोहली कोलकाताविरूद्ध जेव्हा मैदानात उतरला, त्यावेळी त्याने २०० IPL सामने पूर्ण केले. २०० सामने खेळणाऱ्यांमध्ये धोनी, रैना आणि रोहितचेदेखील नाव आहे. पण विराटने जो विक्रम केला, तो इतर कोणालाही जमलेला नाही. विराटने सर्व २०० सामने हे बंगळुरू संघाकडूनच खेळले. एकाच संघाकडून २०० सामने खेळणारा विराट हा पहिलाच खेळाडू ठरला. बाकीच्या खेळाडूंनी विविध संघातून खेळताना एकूण २०० सामन्यांचा टप्पा गाठला. पण विराटने २००८ला बंगळुरूचा हात धरला तो अद्यापही सोडलेला नाही.

यंदाच्या स्पर्धेनंतर विराट सोडणार RCB चे कर्णधारपद

भारतीय संघाचा कर्णधार विराट कोहली याने काही दिवसांपूर्वीच भारताच्या टी२० संघाचा राजीनामा दिला. T20 World Cup नंतर विराट भारताच्या टी२० संघाच्या कर्णधारपदावरून पायउतार होणार असल्याचे त्याने सांगितले. त्यानंतर रविवारी विराटने आणखी एक मोठी घोषणा केली. IPL 2021 हे पर्व संपल्यानंतर विराट कोहली RCB म्हणजेच रॉयल चॅलेंजर्स बंगळुरूच्या कर्णधार पदावरूनही दूर होणार असल्याचे विराटने स्पष्ट केले. विराटचा हा व्हिडीओ रॉयल चॅलेंजर्स बंगळुरू संघाच्या ट्वीटर हँडलवर पोस्ट केला आणि माहिती दिली.