RCB vs SRH Playing 11 IPL 2024 : आयपीएलच्या यंदाच्या मोसमात सहा सामन्यांमधून फक्त एका लढतीत विजय मिळवणाऱ्या रॉयल चॅलेंजर्स बंगळूरसमोर आज सनरायझर्स हैदराबाद संघाचे आव्हान असणार आहे. हैदराबाद संघाने सलग दोन लढतींत विजय मिळवला असून आता त्यांचा संघ विजयाच्या हॅट्‌ट्रिकसाठी सज्ज झाला असेल.

पॅट कमिन्सच्या नेतृत्वात मैदानात उतरणाऱ्या हैदराबादच्या संघाने पाच सामन्यांमधून तीनमध्ये विजय मिळवले आहेत. फाफ ड्युप्लेसीच्या बंगळूर संघाला मागील चार सामन्यांत लाजिरवाण्या पराभवाला सामोरे जावे लागले आहे. याच पार्श्वभूमीवर बंगळूरचा संघ आजच्या लढतीत हैदराबादला रोखणार का, असा प्रश्‍न या वेळी निर्माण झाला आहे.

विराट कोहलीने एक शतक व दोन अर्धशतकांसह ३१९ धावा फटकावल्या आहेत. मात्र, विराट वगळता बंगळूर संघातील इतर फलंदाजांना धमक दाखवता आलेली नाही. फाफ ड्युप्लेसी (१७० धावा), दिनेश कार्तिक (१४३ धावा), रजत पाटीदार (१०० धावा), कॅमेरुन ग्रीन (६८ धावा), महिपाल लोमरोर (५० धावा) व ग्लेन मॅक्सवेल (३२ धावा) यांना बंगळूरसाठी धावा उभारता आलेल्या नाहीत. बंगळूरसाठी ही डोकेदुखी ठरली आहे.

फलंदाजीत सुमार कामगिरी होत असलेल्या बंगळूरच्या गोलंदाजांनाही निराशेला सामोरे जावे लागले आहे. प्रमुख वेगवान गोलंदाज मोहम्मद सिराज याच्या गोलंदाजीवर १०.४० च्या सरासरीने धावा काढण्यात आल्या आहेत. सहा सामन्यांमधून त्याने फक्त चारच फलंदाज बाद केले आहेत.

यश दयालने बंगळूरसाठी सर्वाधिक पाच विकेट मिळवल्या आहेत; पण त्याला सामन्याला कलाटणी गोलंदाजी करता आलेली नाही. ग्लेन मॅक्सवेल, रीस टॉप्ली, विजयकुमार वैशाख, कॅमेरुन ग्रीन, मयांक डागर यांनाही अपयशाला सामोरे जावे लागले आहे. एकूणच काय तर बंगळूरला प्ले ऑफमध्ये पोहोचण्याच्या शर्यतीत कायम राहायचे असल्यास त्यांना सर्व बाबींमध्ये कमालीचा खेळ उंचवावा लागणार आहे.

क्लासेन, अभिषेक, हेड फॉर्ममध्ये

हैदराबाद संघासाठी हेनरिक क्लासेन (१८६ धावा), अभिषेक शर्मा (१७७ धावा) व ट्रॅव्हिस हेड (१३३ धावा) या तीन फलंदाजांनी कात टाकली आहे. या तीन फलंदाजांनी धावा करण्यासोबतच फलंदाजीचा स्ट्राईक रेटही अव्वल दर्जाचा ठेवला आहे. क्लासेन याने १९३च्या स्ट्राईक रेटने, अभिषेकने २०८च्या स्ट्राईक रेटने व हेडने १७२च्या स्ट्राईक रेटने धावा फटकावल्या आहेत. बंगळूरच्या गोलंदाजांना या तीन फलंदाजांना बांधून ठेवावे लागणार आहे. एडन मार्करम व नितीशकुमार रेड्डी यांनीही आश्‍वासक खेळी केल्या आहेत.

कमिन्स, नटराजन प्रभावी

हैदराबादने गोलंदाजी विभागात समाधानकारक कामगिरी केली आहे. कर्णधार पॅट कमिन्सने ७.३०च्या सरासरीने धावा देत सहा फलंदाज बाद केले आहेत. टी. नटराजन याने पाच फलंदाज बाद केले आहेत. या दोघांनी संघासाठी मोलाची कामगिरी बजावली आहे; पण जयदेव उनाडकट, भुवनेश्‍वरकुमार, नितीशकुमार रेड्डी यांच्या गोलंदाजीत सातत्याचा अभाव जाणवत आहे. त्यामुळे या गोलंदाजांनी दबावाखाली आपला खेळ उंचावण्याची गरज आहे.