IPL 2022 : मुंबई इंडियन्सचा कर्णधार रोहित शर्मा (Rohit Sharma) हे तसे साळढाळ व्यक्तीमत्व आहे. त्याच्या कॅज्युअल वागण्याचे अनेक किस्से आपण ऐकले आहेत. असाच एक किस्सा मुंबई इंडियन्सचा (Mumbai Indians) युवा फलंदाज डेवाल्ड ब्रेविस (Dewald Brevis) याच्याबरोबरही घडला. याबाबतचा व्हिडिओ मुंबई इंडियन्सने आपल्या ट्विटवर शेअर केला आहे. या व्हिडिओत मुंबई इंडियन्सचे काही खेळाडू मुलांबरोबर व्हिडिओ कॉलिंगद्वारे संवाद साधत होते.

या व्हिडिओ कॉलिंगसाठी तीन खुर्च्या ठेवण्यात आल्या होत्या. त्यातील मध्यल्या खुर्चीवर (Chair) ब्रेविस बसला होता. दरम्यान तेथे रोहित आल्यानंतर ब्रेविस अस्वस्थ झाला आणि खुर्चीवरून उठून मधल्या खुर्चीवर रोहितला बसण्यासाठी सांगू लागला. तो आपल्या कर्णधाराला सांगत होता की मधली खुर्ची ही तुमच्यासाठी आहे. यावर मुंबईचा कर्णधाराने नाही नाही त्यावर तू बस असे म्हणत त्याला मधल्या खुर्चीवर बसवले.

यावेळी ब्रेविसच्या चेहऱ्यावर हास्य उमटले यावरून रोहित शर्माच्या या कृतीमुळे ब्रेविस हा प्रवाभित झाला असल्याचे जाणवले. सोशल मीडियावर देखील रोहितच्या या कृतीची जोरदार स्तुती होत आहे. डेवाल्ड ब्रेविसने यंदाच्या हंगामात आतापर्यंत 6 सामने खेळले आहेत. त्यात त्याने 124 धावा केल्या आहेत. याचबरोबर त्याने गोलंदाजीतही कमाल दाखवत विराट कोहलीची विकेट घेतली होती.

मुंबई इंडियन्सची यंदाच्या हंगामात चांगली कामगिरी झालेली नाही. त्यांना प्ले ऑफमध्ये स्थान मिळवता आलेले नाही. मात्र मुंबईच्या काही युवा खेळाडूंनी आपल्या पहिल्याच हंगामात चांगलेच प्रभावित केले. यात डेवाल्ड ब्रेविस आणि तिलक वर्मा या दोन फलंदाजांचा समावेश आहे. यंदाच्या हंगामात रोहित शर्माचा देखील फलंदाजीतला फॉर्म खराब राहिला आहे.