Rohit Sharma Post: इंडियन प्रीमियर लीग २०२४ (IPL 2024) स्पर्धेचा २० वा सामना रविवारी (७ एप्रिल) मुंबई इंडियन्स आणि दिल्ली कॅपिटल्स या दोन संघांमध्ये खेळला गेला. या सामन्यात मुंबई इंडियन्सने आयपीएलच्या १७ व्या हंगामातील आपला पहिला विजय मिळवत दिल्लीला २९ धावांनी पराभूत केले आहे.

मुंबईच्या फलंदाजी केली, तसेच शेवटच्या षटकात रोमरियो शफर्डने केलेल्या आक्रमणामुळे मुंबई संघ २३४ धावा करु शकला. त्यानंतर दिल्ली संघ २३५ धावांच्या लक्ष्याचा पाठलाग करण्यात अपयशी ठरला. २० षटकात दिल्लीला केवळ २०५ धावा करता आल्या.

पहिला विजय मिळाल्यानंतर मुंबईचा माजी कर्णधार रोहित शर्माने एक पोस्ट शेअर केली आहे, ज्यामध्ये त्याने म्हंटल आहे की, 'खाता खुल गया'. या पोस्टमध्ये रोहितने आपल्या इंस्टाग्राम आकाऊंटवरुन तीन फोटो शेअर केले आहेत, ज्यामध्ये कर्णधार हार्दिक पंड्याचा एकही फोटो नाही.

रोहितने शेअर केलेल्या पहिल्या फोटोत तो रोमारिओ शेफर्डसोबत आनंद साजरा करताना दिसत आहे, दूसऱ्या फोटोत लहान मुले आनंद साजरा करताना दिसत आहेत, तर तिसऱ्या फोटोत दिल्लीचा कर्णधार रिषभ पंतसोबत तो दिसत आहे.

या सामन्यात दिल्ली कॅपिटल्सने टाॅस जिंकत गोलंदाजीचा निर्णय घेतला होता. पहिल्यांदा फलंदाजी करताना मुंबईने २० षटकात आपले ५ विकेट्स गमवत २३४ धावा केल्या. मुंबईकडून रोहितने ४९, ईशान किशनने ४२, हार्दिक पांड्याने ३९, टीम डेविडने ४५ आणि रोमारिओ शेफर्डने ३९ धावा केल्या. दिल्लीच्या अक्षर आणि नॉर्कियाने प्रत्येकी २ विकेट घेतल्या.

२३५ धावांच्या लक्ष्याचा पाठलाग करताना दिल्लीच्या पृथ्वी शाॅने ६६, तर ट्रिस्टान स्टब्सने ७१ धावांची अर्धशतकी खेळी केल्या. तसेच अभिषेक पोरेलने ४१ धावा केल्या.

मात्र, अन्य कोणाला फारशी चमकदार कामगिरी करता आली नाही. त्यामुळे दिल्लीला २० षटकात ८ गडी गमावत २०५ धावाच करता आल्या. मुंबईकडून गोलंदाजीत गेराल कोएत्झीने ४ बळी घेतले, तर बुमराहने २ विकेट घेतल्या.

गुणतालिकेत बदल

या विजयानंतर मुंबई इंडियन्स संघ गुणतालिकेत आठव्या क्रमांकावर पोहोचला आहे, तर दिल्ली कॅपिटल्स संघ दहाव्या क्रमांकावर पोहोचला आहे. मुंबई इंडियन्स आपला पुढचा सामना ११ एप्रिलला आरसीबीसोबत खेळणार आहे, तर दिल्ली कॅपिटल्सचा पुढचा सामना १२ एप्रिलला लखनौ सुपर जायंट्सविरुद्ध पार पडणार आहे.