Ruturaj Gaikwad IPL Record: इंडियन प्रीमियर लीग 2024 स्पर्धेत 29वा सामना रविवारी (14 एप्रिल) चेन्नई सुपर किंग्स विरुद्ध मुंबई इंडियन्स संघात झाला.

वानखेडे स्टेडियमवर झालेल्या या सामन्यात चेन्नई सुपर किंग्सचा कर्णधार ऋतुराज गायकवाडने अर्धशतकी खेळी करताना मोठ्या विक्रमाला गवसणी घातली.

ऋतुराजने या सामन्यात 40 चेंडूत 69 धावांची खेळी केली. या खेळीत ऋतुराजने 5 चौकार आणि 5 षटकार ठोकले. या खेळीदरम्यान ऋतुराजने आयपीएल कारकिर्दीत २००० धावा पूर्ण केल्या. त्याने 58 आयपीएल सामने खेळताना 57 डावात 2021 धावा केल्या आहेत.

ऋतुराजने मोडला सचिन तेंडुलकरचा विक्रम

त्यामुळे ऋतुराज आयपीएलमध्ये सर्वात कमी डावात 2000 धावा करणारा भारतीय क्रिकेटपटू ठरला आहे, तर एकूण तिसऱ्या क्रमांकाचा खेळाडू ठरला आहे. ऋतुराजने या विक्रमाच्या यादीत केएल राहुल आणि सचिन तेंडुलकरला मागे टाकले आहे.

केएल राहुलने 60 डावांमध्ये 2000 आयपीएल धावा केल्या होत्या, तर सचिन तेंडुलकरने 63 डावात 2000 धावांचा टप्पा गाठला होता.

आयपीएलमध्ये सर्वात कमी डावात 2000 धावा करण्याचा विक्रम ख्रिस गेलच्या नावावर आहे. गेलने 48 डावात हा पराक्रम केला आहे, तर दुसऱ्या क्रमांकावर असलेल्या शॉन मार्शने 52 डावात आयपीएलमध्ये 2000 धावा केल्या होत्या.

आयपीएलमध्ये सर्वात कमी डावात 2000 धावा करणारे क्रिकेटपटू

• 48 डाव - ख्रिस गेल

• 52 डाव - शॉन मार्श

• 57 डाव- ऋतुराज गायकवाड

• 60 डाव - केएल राहुल

• 63 डाव - सचिन तेंडुलकर

चेन्नईचा प्रमुख खेळाडू

ऋतुराजने 2020 मध्ये चेन्नई सुपर किंग्सकडून आयपीएलमध्ये पदार्पण केले होते. तेव्हापासून तो चेन्नई संघाचा महत्त्वाचा भाग राहिला आहे. त्याने चेन्नईकडून 2021 हंगामात 635 धावा करत ऑरेंज कॅपही जिंकली होती. तसेच त्याने गेल्यावर्षीही 550 धावांचा टप्पा पार केला होता.

इतकेच नाही आयपीएल 2024 पूर्वी चेन्नई सुपर किंग्स संघाच्या नेतृत्वाची जबाबदारीही त्याच्याकडे देण्यात आली आहे. या हंगामापूर्वी एमएस धोनीने नेतृत्वपदाचा राजीनामा दिला आणि ही जबाबदारी ऋतुराजच्या हाती सोपवली आहे. त्यामुळे ऋतुराज आयपीएल 2024 मध्ये चेन्नईचे नेतृत्व करतानाही दिसत आहे.