चेन्नई सुपर किंग्जने मुंबईतील डी.वाय. पाटील स्टेडियमवर रॉयल चॅलेंजर्स बंगळुरु विरुद्धची लढाई 200 पारची केली आहे. पहिल्या दोन विकेट स्वस्तात गमावलेल्या चेन्नई संघाचा डाव सलामीवीर रॉबिन उथप्पा आणि शिवम दुबे (Shivam Dube) या जोडीनं सावरला. दोघांनी तिसऱ्या विकेटसाठी 165 धावांची भागीदारी रचली. शिवम दुबेनं नाबाद 95 धावा केल्या. ही खेळी त्याच्या आयपीएल कारकिर्दीतील सर्वोच्च खेळी आहे. याशिवाय त्याने बंगळुरु विरुद्ध चेन्नईकडून सर्वाधिक धावांची खेळी करणाऱ्या मुरली विजयच्या विक्रमाशीही बरोबरी केलीये. याआधी 2011 च्या हंगामात मुरली विजयने चेन्नईकडून खेळताना बंगळुरु विरुद्ध 95 धावांची खेळी केली होती.