Sunil Gavaskar on Rohit Sharma : मुंबई इंडियन्स संघाचे आव्हान संपलेले होतेच, पण अखेरच्या सामन्यात रोहित शर्माच्या बॅटमधून धावा होणे हे भारतीय संघासाठी सुचिन्ह आहे, असे मत भारताचे माजी दिग्गज फलंदाज सुनील गावसकर यांनी व्यक्त केले.

या आयपीएलमध्ये पहिल्या टप्प्यात चेन्नईविरुद्ध वानखेडे स्टेडियमवर रोहित शर्माने नाबाद १०५ धावांची खेळी केली. त्यानंतर रोहितचा फॉर्म हरपला होता. सातपैकी चार सामन्यांत तो एकेरी धावांवर बाद झाला होता. त्यानंतर शुक्रवारी लखनौविरुद्ध त्याने ३८ चेंडूंत ६८ धावांची खेळी केली. त्यात त्याने तीन शानदार षटकार मारले.

मुंबई इंडियन्स प्ले-ऑफसाठी पात्र ठरणार नाही, हे अगोदरच स्पष्ट झाले होते, पण अखेरच्या सामन्यात तरी रोहित शर्माकडून धावा होणे हे भारतीय संघासाठी महत्त्वाचे होते. कारण पुढच्या १५ दिवसांत ट्वेन्टी-२० विश्वकरंडक सुरू होणार आहे आणि कर्णधार रोहित शर्मावर भारताची मोठी मदार असणार आहे, असे गावसकर यांनी सांगितले.

विश्वकरंडक स्पर्धेत रोहित शर्माने चांगली सुरुवात करून दिली तर भारतीय संघाला लय मिळेल आणि मधल्या फळीतील फलंदाजांनी सातत्य राखले तर द्विशतकी धावा भारताला सहज करता येतील, असे गावसकर यांचे म्हणणे आहे.

१ जूनपासून विश्वकरंडक स्पर्धा सुरू होत आहे. मात्र भारताचा पहिला सामना ५ जूनला होणार आहे. त्याअगोदर बांगलादेशविरुद्ध सराव सामना होणार आहे.