लिमा : येथे सुरू असलेल्या आंतरराष्ट्रीय शूटिंग फेडरेशनच्या जागतिक ज्युनियर अजिंक्यपद स्पर्धेत गुरुवारी भारताने दहावे सुवर्णपदक जिंकले आहे. भारताच्या रिदम सांगवान आणि विजयवीर सिद्धू या जोडीने २५ मीटर रॅपिड फायर मिश्र स्पर्धेत सुवर्णपदक जिंकत दिमाखदार कामगिरी बजावली.

सांगवान आणि सिद्धू यांनी थायलंडच्या कन्याकोर्न हिरुनफोम आणि श्वाकोन त्रिनिफक्रॉनचा ९-१ असा पराभव करत भारताच्या एकूण पदकांची आकडेवारी २३ वर नेली आणि पदतालिकेतील अव्वल स्थान भक्कम केले. १७ वर्षीय रिदम सांगवानचे हे या स्पर्धेतील तिसरे सुवर्णपदक ठरले. तिने १० मीटर आणि २५ मीटर महिला पिस्तूल सांघिक प्रकारातही पदक जिंकले आहे.

भारताच्या तेजस्विनी आणि अनिशने थायलंडच्याच चाविसा पदुका आणि राम खामहेंगविरुद्ध १०-८ ने विजय मिळवीत याच प्रकारातील ब्राँझपदक जिंकले, तर ज्युनिअर महिलांच्या ५० मीटर रायफल ३ पोझिशन (३ पी) प्रकारातील प्रसिध्दी महंत, निश्चल आणि आयुषी पोडर यांनी सांघिक रौप्यपदकाला गवसणी घातली.सांगवान आणि सिद्धू जोडगोळीने सुरुवातीपासूनच सामन्यावर पूर्णपणे वर्चस्व राखत थाय जोडीला एकही फेरी जिंकू दिली नाही. दुसरीकडे ३ पी महिला प्रकारात भारताच्या संघाचा अमेरिकेच्या एलिझाबेथ मॅकगिन, लॉरेन झौन आणि कॅरोलिन टकर या त्रिकुटाने ४३-४७ असा पराभव केला. त्यामुळे त्यांना रौप्यपदकावर समाधान मानावे लागले.

दरम्यान, उद्या स्पर्धेचा शेवटचा दिवस असून, त्यात दोन पदक स्पर्धा नियोजित आहेत. दहा सुवर्ण, नऊ रौप्य आणि चार ब्राँझ पदकांसह भारत सध्या पदकतालिकेत आघाडीवर असून त्यापाठोपाठ सहा सुवर्णांसह अमेरिका दुसऱ्या स्थानावर आहे.