India Vs England James Anderson Playing 11 : भारत आणि इंग्लंड यांच्यातील पहिली कसोटी 25 जानेवारी पासून हैदराबाद येथे सुरू होत आहे. कसोटी सुरू होण्याच्या एक दिवस आधीच पाहुण्या इंग्लंडने आपली प्लेईंग 11 घोषित केली आहे. इंग्लंडने हैदराबाद कसोटीत तीन फिरकी गोलंदाज घेऊन मैदानात उतरण्याचं ठरवलं आहे.

त्याच्या जोडीला मार्क वूड हा एकमेव वेगवान गोलंदाज असणार आहे. इंग्लंडने आपला सर्वात अनुभवी गोलंदाज जेम्स अँडरसनचा पहिल्या कसोटीसाठी विचार केलेला नाही. जेम्स अँडरसनने आंतरराष्ट्रीय कसोटी क्रिकेटमध्ये तब्बल 690 विकेट्स घेतल्या आहेत.

भारत आणि इंग्लंड यांच्यातील हैदराबाद येथे खेळवण्यात येणाऱ्या पहिल्या कसोटीतील खेळपट्टी ही फिरकीला साथ देण्याची शक्यता आहे. त्यामुळेत पाहुण्या इंग्लंड संघाने आपल्या प्लेईंग 11 मध्ये तीन फिरकीपटूंचा समावेश केला आहे. यात रेहान अहमद, जॅक लिच आणि टॉम हार्टली यांचा समावेश आहे.

वेगवान गोलंदाजांचा तगडा ताफा असलेल्या इंग्लंडने पहिल्या कसोटीसाठी प्लेईंग 11 मध्ये एकच वेगवान गोलंदाज निवडला आहे. मार्क वूड हा एकमेव इंग्लिश गोलंदाज असणार आहे जो हैदराबादच्या खेळपट्टीवर गोलंदाजी करताना दिसेल. अँडरनला डावलून त्याला संधी देण्यात आली आहे. बेन स्टोक्स देखील वेगवान गोलंदाजी करतो त्यामुळे मार्क वूड सोबत स्टोक्स नवीन चेंडू टाकताना दिसेल.

इंग्लंडची पहिल्या कसोटीसाठीची प्लेईंग 11 :

झॅक क्राऊली, बेन डकेट, ओली पोप, जो रूट, जॉनी बेअरस्टो, बेन स्टोक्स (कर्णधार), बेन फोक्स (यष्टीरक्षक), रेहान अहमद, टॉम हार्टली, मार्क वूड, जॅक लीच.

इंग्लंडचा फिरकीपटू हार्टलीने सोमवारी विस्डेन क्रिकेट मंथलीला मुलाखत दिली होती. त्यावेळी तो म्हणाला की, 'मी यापूर्वी फक्त एकदाच भारत दौरा केला आहे. इथल्या खेळपट्ट्या फिरकीला फार पोषक असतात. तुम्हाला चेंडूला फ्लाईट देण्याची किंवा दुसरं काही विचार करण्याचा गरजच नसते. खेळपट्टी सर्वकाही करत असते.'

'काऊंटी क्रिकेटमधील खेळपट्ट्या या यापेक्षा खूप फ्लॅट असतात. त्यामुळे फिरकी गोलंदाजांना तिथे अधिक कसब वापरावं लागतं. मात्र भारतात तुम्ही पूर्णपणे वर्चस्व गाजवू शकता.'

(Sports Latest New)