मुंबई : आशियाई उपविजेत्या कविंदर बिश्‍तने जागतिक बॉक्‍सिंग स्पर्धेतील भारतीयांचे विजयी ठोसे कायम राखताना 57 किलो गटात उपउपांत्यपूर्व फेरीत प्रवेश केला. दरम्यान, मनीष कौशिकनेही (63 किलो) गटात आगेकूच केली आहे.

पाचव्या मानांकित कविंदरने चीनच्या झेन झिहाओ याचा 3-2 असा पाडाव केला. कमालीच्या चुरशीच्या लढतीत कविंदर वेग आणि दमछाकमध्ये सरस ठरला. त्याने मोक्‍याच्या वेळी ठोसे देत आपल्या बाजूने 30-27, 29-28, 30-27, 28-29, 28-29 असा कौल देण्यास भाग पाडले. रशियात सुरू असलेल्या या स्पर्धेत भारताच्या सातपैकी सहा बॉक्‍सरनी आगेकूच केली आहे. केवळ आशीष कुमारचे (75 किलो) आव्हान आटोपले आहे.

लढत चांगली झाली. दोन लढतीत दीर्घ ब्रेक असल्याचा कामगिरीवर काहीसा परिणाम झाला. मात्र लढतीची योजना तयार असल्यामुळे माझ्यापेक्षा ऊउंच आणि वेगवान प्रतिस्पर्ध्यास पराजित करू शकलो. आगामी प्रतिस्पर्धीही ऊउंच असल्याने या लढतीचा नक्कीच फायदा होईल, असे त्याने सांगितले.

पहिलीच जागतिक स्पर्धा खेळणाऱ्या मनीषने नेदरलॅंडस्‌च्या एनरिको लॅक्रूझ याचा 5-0 असा पाडाव केला. माजी राष्ट्रीय विजेत्या मनीषने दोन्ही हातांचा चांगला समन्वय राखला आणि प्रतिस्पर्ध्याला बचावाचीही संधी दिली नाही.