Kieron Pollard : वेस्ट इंडीजचा माजी कर्णधार कायरॉन पोलार्डने टी 20 क्रिकेटमध्ये एक मोठे रेकॉर्ड आपल्या नावावर केले आहे. विंडीजचा धडाकेबाज फलंदाज पोलार्ड द हंड्रेड स्पर्धेत लंडन स्पिरीट कडून खेळतोय. या स्पर्धेत मँचेस्टर ओरिजनल्सविरूद्धचा सामना हा पोलार्डचा 600 वा टी 20 सामना ठरला. पोलार्डने आपला 600 व्या टी 20 सामन्यात 11 चेंडूत 34 धावा चोपल्या. त्यात त्याने एक चौकार आणि चार षटकार ठोकले.

पोलार्डची टी 20 मधील आकडेवारी जबरदस्त आहे. त्याने 600 सामन्यात 11,723 धावा केल्या आहेत. त्याची सरासरी 31.34 इतकी आहे. त्याची 104 धावा ही टी 20 मधील सर्वोत्त कामगिरी आहे. पोलार्डने टी 20 मध्ये एक शतक आणि 56 अर्धशतके ठोकली आहे. याचबरोबर त्याने 309 विकेट देखील घेतल्या आहेत. 15 धावात 4 विकेट ही त्याची बेस्ट बॉलिंग फिगर आहे.

कायरॉन पोलार्डने टी 20 क्रिकेट प्रकारात अनेक संघांचे प्रतिनिधित्व केले आहे. यात वेस्ट इंडीज, त्रिनिदाद आणि टोबॅगो, मुंबई इंडियन्स, अॅडलेड स्ट्रायकर्स, मेलबर्न रेनेगॅड्स, ढाका ग्लॅडियेटर्स आणि ढाका डायनामिक्स, कराची किंग्ज, मुल्तान सुल्तान, पेशावर झालमी ट्रिनबॅगो नाईट रायडर्स या संघाचा समावेश आहे. कायरॉन पोलार्डनंतर सर्वाधिक टी 20 सामने खेळणाऱ्यांच्या यादीत ड्वेन ब्राव्हो (543 सामने), शोएब मलिक (472 सामने), ख्रिस गेल (463 सामने), रवी बोपारा (426 सामने) यांचा समावेश आहे.