ICC T20I Rankings: भारतीय क्रिकेट संघाने नुकतेच झिम्बाब्वे विरूद्धच्या टी20 मालिकेत 4-1 अशा फरकाने विजय मिळवला आहे. या टी20 मालिकेनंतर आयसीसीने बुधवारी (17 जुलै) ताजी टी20 क्रमवारी जाहीर केली आहे. या क्रमवारीनुसार भारताच्या काही खेळाडूंना फायदा झालाय, तर काही खेळाडूंना नुकसान झाले आहे.

या सामन्यात तीन सामन्यांत 141 धावा करणाऱ्या यशस्वी जयस्वालने फलंदाजांच्या यादीत चार स्थानांनी झेप घेत सहावा क्रमांका मिळवला आहे. तसेच 5 सामन्यांमध्ये 170 धावा करणाऱ्या गिलनेही 36 स्थानांनी मोठी उडी घेतली आणि 37 वे स्थान मिळवले आहे.

विशेष म्हणजे तो भारताचा क्रमवारीत चौथा सर्वोत्तम खेळाडू आहे. त्याच्यापुढे असणारे सुर्यकुमार यादव दुसऱ्या क्रमांकावर आहे, यशस्वी जयस्वाल सहाव्या क्रमांकावर आहे, तर ऋतुराज गायकवाड आठव्या क्रमांकावर आहे.

गायकवाड यापूर्वी 7 व्या क्रमांकावर होता, मात्र तो सध्या आठव्या क्रमांकावर घसरला आहे. फलंदाजांच्या यादीत अव्वल क्रमांकावर ट्रेविस हेड काय आहे.

गोलंदाजांच्या यादीत भारताविरुद्ध 6 विकेट्स घेणारा ब्लेसिंग मुझराबनी आता 11 स्थानांनी पुढे येत 44 व्या क्रमांकावर आलाय, तर भारताचा वॉशिंग्टन सुंदर 46 वरून 36 व्या क्रमांकावर आणि मुकेश कुमार 73 व्या क्रमांकावर आले आहेत. त्यांचीही झिम्बाब्वेविरुद्ध चांगली कामगिरी झाली होती.

गोलंदाजी क्रमवारीत अव्वल क्रमांकावर आदिल राशिद अव्वल क्रमांकावर कायम आहे, तर एन्रिक नॉर्किया दुसऱ्या क्रमांकावर आहे. पहिल्या 10 मध्ये भारताचा एकही खेळाडू नसून भारताचा सर्वोत्तम क्रमवारी असलेला खेळाडू सध्या अक्षर पटेल आहे, तो 13 व्या क्रमांकावर आहे.

अष्टपैलू खेळाडूंच्या यादीत हार्दिक पांड्याची घसरण झाली आहे. तो पहिल्या क्रमांकाहून थेट सहाव्या क्रमांकावर घसरला आहे. आता पहिल्या क्रमांकावर श्रीलंकेचा वनिंदू हसरंगा आहे, तर दुसऱ्या क्रमांकावर मार्कस स्टॉयनिस, तिसऱ्या क्रमांकावर झिम्बाब्वेचा कर्णधार सिकंदर रझा, चौथ्या क्रमांकावर शाकिब-अल-हसन आणि पाचव्या क्रमांकावर मोहम्मद नबी आहे.