मस्कत : लेजंड्स लीग क्रिकेट (Legends League Cricket) स्पर्धेत तिसऱ्या सामन्यात इंडिया महाराजाला (India Maharajas) वर्ल्ड जायंट्स (World Giants) विरूद्ध २१० धावा करून देखील पराभवचा सामना करावा लागला. इंडिया महाराजाच्या पराभवाचे मुख्य कारण ठरला तो दक्षिण आफ्रिकेचा माजी फिरकीपटू इम्रान ताहिर (Imran Tahir). त्याने गोलंदाजीत काही कमाल दाखवली नाही तर आश्चर्यकारकरित्या फलंदाजीत तुफान फटकेबाजी करत इंडिया महाराजाच्या तोंडचा घास हिरावून घेतला. (Legends League Cricket Imran Tahir explosive batting video)

प्रथम फलंदाजी करणाऱ्या इंडिया महाराजाने सलामीवीर नमन ओझाच्या (Naman Ojha) ६९ चेंडूत केलेल्या १४० धावांची धडाकेबाज शतकी खेळीच्या जोरावर २१० धावा उभारल्या. इंडिया महाराजाचा कर्णधार मोहम्मद कैफने (Mohammad Kaif) ५३ धावांची महत्वपूर्ण खेळी केली. इंडिया महाराजाने वर्ल्ड जायंट्स समोर ठेवलेल्या २१० धावांचे मोठे आव्हान पाहता इंडिया महाराजा हा सामना आरामात जिंकतील असे वाटत होते.

मात्र वर्ल्ड जायंट्सचा ४२ वर्षाचा तरूण इम्रान ताहिरने (Imran Tahir) फक्त १९ चेंडूत ५२ धावांची नाबाद अर्धशतकी खेळी करत सामन्याचे चित्रच पालटले. वर्ल्ड जायंट्सने सामना तीन चेंडू राखून जिंकला. ताहिर बरोबरच वर्ल्ड जायंट्सकडून केविन पिटरसनने २७ चेंडूत ५३ धावांची खेळी केली.