पुणे : पुण्याच्या दोन्ही संघांनी महाराष्ट्र राज्य ऑलिंपिक क्रीडा स्पर्धेतील हॉकी या खेळामध्ये दुहेरी धमाका केला. पुण्याच्या पुरुष आणि महिला संघांनी रविवारी दोन्ही गटांत कोल्हापूर संघांवर मात करत सुवर्णपदकांना गवसणी घातली.

पुणे पुरुष संघाने कोल्हापूर संघाचा १४ - १ असा धुव्वा उडवला, तर पुण्याच्या महिला संघाने उत्कर्षा काळेच्या चार गोलांच्या जोरावर कोल्हापूरचा ६-० असा पराभव केला. पुरुष गटाच्या ब्राँझपदकाच्या लढतीत नांदेडने जळगाववर २-१ असा विजय संपादन केला, तर महिला गटात औरंगाबादने साताऱ्यावर १२-० अशी मात करून तिसरे स्थान पटकावले.

मुंबई शहरला निसटते विजेतेपद

कबड्डी या खेळातील पुरुषांच्या गटात मुंबई शहर संघाने मुंबई उपनगर संघाला दोन गुणांनी पराभूत केले आणि अजिंक्यपदावर नाव कोरले. मुंबई शहर व मुंबई उपनगर हे दोन्ही पारंपरिक प्रतिस्पर्धी विजेतेपदासाठी लढत असल्यामुळे अंतिम सामन्याबाबत कमालीची उत्सुकता निर्माण झाली होती. मध्यंतराला दोन्ही संघ प्रत्येकी आठ गुणांवर होते. उत्तरार्धातही शेवटपर्यंत चुरस पाहावयास मिळाली. अखेर मुंबई शहर संघाने हा सामना ३०-२८ असा दोन गुणांनी जिंकला.

महिलांमध्ये पुण्याचे वर्चस्व

कबड्डीत महिला गटाच्या अंतिम फेरीत पुण्याने मुंबई उपनगर संघाचे आव्हान ३९-१९ असे मोडून काढले. पूर्वार्धात ते १८ विरुद्ध ९ असे आघाडीवर होते. अंकिता जगताप व साक्षी काळे यांनी छान खेळ केला.

टेबल टेनिसमध्ये ठाण्याचा स्मॅश

बालेवाडी क्रीडा संकुलाच्या इनडोअर हॉलमध्ये पार पडलेल्या टेबल टेनिस स्पर्धेत ठाण्याने पुरुष आणि महिला अशा दोन्ही गटांच्या विजेतेपदांवर आपले नाव कोरले. महिला एकेरीत नाशिकच्या सायली वाणीने सहकारी तनिषा कोटेचावर ४-२ असा विजय मिळवत सुवर्णपदक पटकावले.