Manu Bhaker Post After end of Paris Olympic 2024 campaign: पॅरिस ऑलिम्पिक २०२४ स्पर्धा भारताची २२ वर्षीय युवा नेमबाज मनू भाकर हिच्यासाठी विक्रमी ठरली. ती या स्पर्धेत नेमबाजीच्या तीन प्रकारांमध्ये सामील झाली होती आणि विशेष म्हणजे तिन्ही प्रकारात तिने अंतिम फेरी गाठली.

यामध्ये तिने १० मीटर एअर पिस्तुल प्रकारात महिला आणि मिश्र गटात कांस्य पदक जिंकले, मात्र शनिवारी (३ ऑगस्ट) झालेल्या महिलांच्या २५ मीटर पिस्तुल प्रकारात तिचं पदक थोडक्यात हुकलं. ती चौथ्या क्रमांकावर राहिली. यासह तिची या स्पर्धेतील मोहिम संपली. दरम्यान, तिने दोन पदकं जिंकून मोठे विक्रमही रचले.

आता तिने यानंतर शनिवारी सोशल मीडियावर सर्वांचे आभार मानले आहेत. तसेच तिच्या यशाबद्दल आनंदही व्यक्त केला आहे.

तिने खास पोस्ट करत लिहिले, 'मला जो पाठिंबा आणि शुभेच्छा मिळत आहेत, त्यामुळे मला गहिवरून आलं आहे. दोन कांस्य पदकं जिंकणं हे स्वप्न पूर्ण होण्यासारखं होतं. हे यश माझ्या एकटीचं नाही, तर ज्यांनी माझ्यावर विश्वास ठेवला आणि मला इथपर्यंत पोहचण्यासाठी पाठिंबा दिला, त्या प्रत्येकाचं आहे.'

'मी हे यश माझ्या कुटुंबाशिवाय, प्रशिक्षक जसपाल राणा सरांशिवाय आणि जे माझ्या पाठीशी उभे होते, त्या सर्वांशिवाय मिळवू शकले नसते, यात NRAI , TOPS , SAI, OGQ, Performax या सर्वांचा विशेषत: हरियाणा सरकारचा वाटा आहे.'

तिने पुढे लिहिले, 'माझ्या देशासाठी सर्वात मोठ्या स्टेजवर स्पर्धा खेळणे आणि कामगिरी करणे हा अत्यंत अभिमानाचा आणि आनंदाचा क्षण आहे. माझ्या या प्रवासाचा भाग झाल्याबद्दल आणि प्रत्येक पावलावर माझ्या बरोबर राहण्याबद्दल आभारी आहे.'

'तुम्ही केललं कौतुक माझ्यासाठी मोठं आहे. पॅरिसमधील माझ्या मोहिमेचा शेवट कडू-गोड राहिला, पण भारताच्या यशात योगदान देण्याचा आनंद आहे. जय हिंद.'

मनू भाकर ही ऑलिम्पिकमध्ये दोन वैयक्तित पदके जिंकणारी भारताची तिसरीच खेळाडू आहे. यापूर्वी पीव्ही सिंधू आणि सुशील कुमार यांनी हा पराक्रम केला आहे. तसेच स्वातंत्र्यानंतर एकाच ऑलिम्पिकमध्ये दोन पदकं जिंकणारी ती भारताची पहिलीच खेळाडू देखील आहे. याशिवाय दोन पदकं जिंकणारी पहिली आणि एकमेव भारतीय नेमबाजही आहे.