Matthew Wade England vs Australia : ऑस्ट्रेलिया आणि इंग्लंड यांच्यात गेल्या आठवड्यात खेळवण्यात आलेल्या टी 20 मालिकेत एक वादग्रस्त घटना घडली होती. ऑस्ट्रेलियाचा विकेटकिपर बॅट्समन मॅथ्यू वेडने झेलबाद होण्यापासून वाचण्यासाठी इंग्लंडचा गोलंदाज मार्क वूडला अवैधरित्या रोखले होते. या वादग्रस्त घटनेनंतर क्रिकेट वर्तुळातून खिलाडूवृत्तीबाबत जोरदार चर्चा सुरू झाली. दरम्यान, मॅथ्यू वेडने या सर्व प्रकारानंतर आता आपली प्रतिक्रिया दिली.

मॅथ्यू वेडने आपण वूड झेल पकडू नये यासाठीच त्याला धक्का मारल्याची कुबली दिली. याचबरोबर वेड पुढे म्हणाला की, जर विरोधी संघाने याबाबत पंचांकडे दाद मागितली असती तर त्याने आनंदाने मैदान सोडले असते. ऑस्ट्रेलिया आणि इंग्लंड याच्यातील टी 20 सामन्यात मॅथ्यू वेडच्या बॅटला चेंडू लागून हवेत उंच उडाला होता. दरम्यान, हा झेल गोलंदाज मार्क वूड पकडू नये म्हणून मॅथ्यू वेडने त्याला हात लांब करत रोखले होते. मार्क वूड झेलही पकडू शकला नाही आणि धावबाद होण्यापासून देखील वाचला.

दरम्यान, वेडने 'द अनप्लेयेबल पॉडकास्ट' या कार्यक्रमात आपण काही चुकीचे केले नाही असे सांगितले. तो म्हणाला की, 'मी सामन्यानंतर हा व्हिडिओ पाहिला त्यावेळी मला खूप वाईट वाटले. ही घटना खूप वेगात घडली.' वेड पुढे म्हणाला की, 'मला असे वाटते की ज्यावेळी मी मैदानातून बाहेर जात होतो त्यावेळी संघ सहकारी केन रिचर्डसनने सांगितले की, तू त्याला धक्का मारलास. मी म्हणालो मला असे नाही वाटत. मग मी रिप्ले पाहिला त्यावेळी मला असे वाटले की हो मी धक्का मारला.'

वेड म्हणाला, 'सुरूवातीला मला माहिती नव्हतं की चेंडू माझ्या बॅटला लागला आहे. मला वाटले चेंडू माझ्या डोक्याला लागला आहे. मी धाव घेण्यासाठी धावलो आणि मला डेव्हिड वॉर्नरने परत पाठवले. मी मागे फिरलो त्यावेळी मला पॉईंटचा खेळाडू धावत माझ्याकडे येताना दिला. मला माहिती नाही की मी धावबाद होणार होतो की नाही, चेंडू कुठं आहे. हे सगळं असं घडलं. इंग्लंडच्या संघाने देखील अपिल केली नाही. मात्र जर इंग्लंडने अपिल केली असती तर मी त्याचा विरोध केला नसता.'