Mayank Agarwal Double Century Ranji Trophy: टीम इंडिया सध्या ऑस्ट्रेलियाविरुद्ध 4 सामन्यांची कसोटी मालिका खेळत आहे. पहिला सामना नागपुरात होत आहे.

दरम्यान, भारतीय संघाचा सलामीवीर मयंक अग्रवाल गेल्या अनेक दिवसांपासून भारतीय कसोटी संघातून बाहेर आहे. भारतीय निवड समितीने त्याच्याकडे सातत्याने दुर्लक्ष केले, पण मयंक अग्रवालने आपल्या फलंदाजीतुन त्यांना चोख प्रत्युत्तर दिले आहे.

भारतीय संघाचा सलामीवीर मयंक अग्रवालने देशांतर्गत स्पर्धांमध्ये धावा करून आपली क्षमता सिद्ध केली. रणजी ट्रॉफीच्या दुसऱ्या उपांत्य फेरीत मयंक अग्रवालने सौराष्ट्रविरुद्ध द्विशतक ठोकत भारतीय संघाचे दार ठोठावले आहे.

फिरकीला अनुकूल एम. चिन्नास्वामी स्टेडियमवर मयंक अग्रवालने 429 चेंडूत 249 धावा केल्या. या खेळीत त्याने 28 चौकार आणि 5 षटकार मारले आहेत. म्हणजेच त्याने 33 चेंडूत चौकार आणि षटकारांसह 142 धावा ठोकल्या. यादरम्यान त्याचा स्ट्राइक रेट 58.04 होता.

मयंकच्या खेळीची खास गोष्ट म्हणजे त्याने येथे सौराष्ट्रविरुद्ध आपल्या संघाचा डाव सांभाळला. कर्नाटकने अवघ्या 112 धावांत पाच विकेट गमावल्या होत्या. एकीकडे कर्नाटकच्या विकेट पत्त्यांप्रमाणे पडत होत्या, तर दुसरीकडे मयंकने विरोधी विरोधी गोलंदाजांना दमवत द्विशतक ठोकले.

मयंक अग्रवालने रणजी ट्रॉफीच्या या मोसमात कर्नाटकसाठी आतापर्यंत सर्वाधिक धावा केल्या आहेत. मयंकने 2022 साली भारत आणि श्रीलंका यांच्यात भारतीय संघासाठी शेवटचा कसोटी सामना खेळला होता.

इतकेच नाही तर मयंकला बऱ्याच दिवसांपासून पांढऱ्या चेंडूच्या क्रिकेटमध्ये पुनरागमन करता आलेले नाही. 2020 मध्ये त्याने ऑस्ट्रेलियाविरुद्ध शेवटचा एकदिवसीय सामना खेळला होता.