जागतिक क्रमवारीत तिसऱ्या स्थानावर असणाऱ्या टेनिसपटू अलेक्झांडर झ्वेरेव्हला (Alexander Zverev) मॅक्सिको ओपनमधील (Mexico Open) आपली एक चूक फारच महागात पडत आहे. त्याने मॅक्सिको ओपनमधील पुरूष दुहेरी सामन्यात अंपायरच्या निर्णयाचा राग त्याच्या खुर्चीवर काढला होता. त्याने एक नाही अनेकवेळा त्याची टेनिस रॅकेट (Tennis Racquet) अंपायर बसलेल्या खुर्चीवर (Umpire Chair) जोरात आपटली होती. त्यात त्याची रॅकेट देखील तुटली. दरम्यान, या अखिलाडूवृत्तीची शिक्षा अलेक्झांडरला भोगावी लागली. त्याला स्पर्धेतून बाहेरचा रस्ता दाखवण्यात आला आहे. तसेच त्याला 40,000 डॉलर्स म्हणजे तब्बल 30 लाख रूपयांचा दंड ठोठावण्यात आला आहे.

याबाबत एटीपीने (Association of Tennis Professionals) अधिकृत वक्तव्य प्रसिद्ध केले. त्यात 'अलेक्झांडरला त्याच्या वर्तनुकीसाठी जास्तीजास्त दंड आकारण्यात आला आहे. याचबरोबर झ्वेरेव्हला सिंगल्स आणि डबल्स सामन्यातून मिळालेली 31570 डॉलरची रक्कम देखील गमवावी लागणार आहे. तसेच त्याला या स्पर्धेतून मिळेल्या सर्व एटीपी रँकिंग पाँईटपासून देखील हात धुवावा लागणार आहे. या प्रकाराची एटीपीच्या नियमांनुसार पडताळणी होणार आहे.' असे सांगण्यात आले.

जर्मनीच्या अलेक्झांडर झ्वेरेव्हने टोकियो ऑलिम्पिकमध्ये सुवर्ण पदक जिंकले होते. तो मॅक्सिको ओपन स्पर्धेत ब्राझीलच्या पार्टनर मार्केलो मेलो सोबत खेळताना 6-2, 4-6, 10-6 असा पारभूत झाला होता. त्याला ब्रिटनच्या लॉईड ग्लासपूल आणि फिनलँडच्या हॅरी हेलिओवारा जोडीने पराभूत केले होते.