India Vs South Africa 2nd ODI : भारतीय गोलंदाजांनी दक्षिण आफ्रिकेला 278 धावात रोखले. भारताच्या प्रभावी माऱ्यासमोर दक्षिण आफ्रिकेला 50 षटकात 7 बाद 278 धावांपर्यंतच मजल मारता आली. दक्षिण आफ्रिकेला शेवटच्या 10 षटकात फक्त 57 धावा करता आल्या. भारताकडून मोहम्मद सिराजने 38 धावात 3 विकेट्स घेतल्या. आफ्रिकेकडून एडेन माक्ररम 79 तर रीझा हेंड्रिक्सने 74 धावांची खेळी केली. मिलरने 34 चेंडूत नाबाद 35 धावा केल्या.

भारत आणि दक्षिण आफ्रिका यांच्यातील दुसऱ्या वनडे सामन्यात आफ्रिकेने नाणेफेक जिंकून प्रथम फलंदाजी करण्याचा निर्णय घेतला. मात्र क्विंटन डिकॉक (5) आणि मलान (25) स्वस्तात माघारी परतले. 10 षटकात 40 धावांवर 2 फलंदाज गमावल्यानंतर आफ्रिकेने सावध फलंदाजी करण्यास सुरूवात केली.

दरम्यान, एडेन माक्ररम आणि भारताविरूद्ध पहिल्यांदाच खेळणाऱ्या रीजा हेंड्रिक्सने भागीदारी रचण्यास सुरूवात केली. हेंड्रिक्सने आक्रमक फलंदाजी करत पहिल्यांदा अर्धशतकी मजल मारली. त्यानंतर माक्ररमने आपले अर्धशतक पूर्ण करत तिसऱ्या विकेटसाठी शतकी भागीदारी रचली.

रीझा हेंड्रिक्स आणि एडेन माक्ररम यांनी दोघांनी अर्धशतके ठोकत तिसऱ्या विकेटसाठी 129 चेंडूत 129 धावांची दमदार भागीदारी रचली. अखेर ही जोडी मोहम्मद सिराजने फोडली. त्याने हेंड्रिक्सला 74 धावांवर बाद केले. हेंड्रक्स बाद झाल्यानंतर आलेल्या हेन्रिच क्लासेनने आक्रमक फलंदाजी करत धावगती वाढवण्यास सुरूवात केली होती. मात्र कुलदीप यादवने त्याला 30 धावांवर बाद करत आफ्रिकेला चौथा धक्का दिला.

कुलदीपने क्लासेनला बाद केल्यानंतर पुढच्याच षटकात ऑफ स्पिनर वॉशिंग्टन सुंदरने 89 चेंडूत 79 धावांची खेळी करणाऱ्या एडेन माक्ररमला बाद केले. यानंतर डेव्हिड मिलर आणि पार्नेल खेळपट्टीवर आले. मात्र भारतीय गोलंदाजांनी शेवटच्या 10 षटकात टिच्चून मारा करत या दोघांना हात खोलण्याची संधी दिली नाही. शार्दुल ठाकूरने वेन पार्नेलला 16 धावांवर बाद करत आफ्रिकेला सहावा धक्का दिला. त्यानंतर मोहम्मद सिराजने शेवटच्या षटकात केशव महाराजला 5 धावांवर बाद करत आफ्रिकेला 50 षटकात 7 बाद 278 धावांवर रोखले.