FIFA MS Dhoni inspired post For Cristiano Ronaldo : एमएस धोनीची लोकप्रियता केवळ क्रिकेट विश्वातच नाही तर जगभरात आहे. धोनी जेव्हा परदेश दौऱ्यावर जातो आणि चाहते त्याला फॉलो करतात तेव्हा याची अनेक उदाहरणे पाहायला मिळाली आहेत.

एमएस धोनीने 2020 मध्ये आंतरराष्ट्रीय क्रिकेटमधून निवृत्ती घेतली होती. 2019 च्या एकदिवसीय वर्ल्ड कपमध्ये त्याने शेवटचा आंतरराष्ट्रीय सामना खेळला. सध्या धोनी फक्त आयपीएलमध्येच खेळताना दिसतो. मात्र त्याची लोकप्रियता दिवसेंदिवस वाढत आहे. धोनीच्या फॅन फॉलोइंगचा अंदाज यावरून लावला जाऊ शकतो की फिफाने क्रिस्टियानो रोनाल्डोचा फोटो 'थाला फॉर ए रीजन' या कॅप्शनसह शेअर केला आहे.

आयपीएल 2024 या संपूर्ण हंगामात एमएस धोनीसाठी सोशल मीडियावर 'थाला फॉर ए रिजन' ट्रेंड करत राहिला. जिथे जिथे 7 नंबर दिसला तिथे चाहत्यांनी 'थला फॉर ए रिजन' असा उल्लेख करायला सुरुवात केली. पण आता हा ट्रेंड फक्त क्रिकेटमध्येच नाही तर फुटबॉलमध्येही फॉलो केला जात आहे. युरो कप 2024 ची सध्या फुटबॉलमध्ये क्रेझ सुरू आहे.

पोर्तुगाल आणि झेक प्रजासत्ताक यांच्यातील सामन्यापूर्वी फिफाने आपल्या अधिकृत इंस्टाग्राम हँडलवरून क्रिस्टियानो रोनाल्डोचा एक फोटो शेअर केला आहे. या फोटोवर फिफाने क्रमांक 7 सोबत 'थाला फॉर ए रिजन' असे कॅप्शन लिहिले आहे.

खरंतर, एमएस धोनीप्रमाणेच रोनाल्डोही 7 नंबरची जर्सी घालून मैदानात उतरतो. यामुळेच फिफाने दोन दिग्गजांना एकत्र ट्रिब्यूट दिला.