Devon Conway MS Dhoni IND vs NZ 1st T20I : भारत आणि न्यूझीलंड यांच्यातील पहिल्या टी 20 सामन्यात किवींचा सलामीवीर डेवॉन कॉन्वेने पुन्हा एकदा भारताविरूद्ध मोठी खेळी केली. चेन्नई सुपर किंग्जचा कर्णधार महेंद्रसिंह धोनीकडून सातत्याने टिप्स घेणाऱ्या डेवॉन कॉन्वेने भारताविरूद्ध शतक, अर्धशतकांचा रतीबच लावला आहे. शेवटच्या वनडे सामन्यात कॉन्वेने 136 धावांची दमदार खेळी केली होती.

आता पहिल्या वनडे सामन्यात 52 धावांची अर्धशतकी खेळी करत भारतासाठी डोकेदुखी ठरला. विशेष म्हणजे रांचीत होत असलेल्या या टी 20 सामन्यापूर्वी कॉन्वे आणि महेंद्रसिंह धोनी चर्चा करतानाचा फोटो सोशल मीडियावर व्हायरल झाला होता. कॉन्वे हा धोनीच्या नेतृत्वाखालील चेन्नई सुपर किंग्जकडून आयपीएल खेळतो.

पहिल्या टी 20 सामन्यात भारताने नाणेफेक जिंकून प्रथम न्यूझीलंडला फलंदाजीला पाचारण केले. किवींनीही पॉवर प्लेचा चांगला फायदा उचलत पहिल्या षटकापासूनच आक्रमक फलंदाजी करण्यास सुरूवात केली. एलन फिनने कर्णधार हार्दिक पांड्याच्या पहिल्याच षटकात 12 धावा चोपल्या. हाच सिलसिला त्याने अर्शदीप आणि वॉशिंग्टन सुंदरच्या बाबतीतही कायम ठेवला.

मात्र सामन्याच्या 5 व्या षटकात वॉशिंग्टन सुंदरने 23 चेंडूत 35 धावा करणाऱ्या फिनला बाद केले. त्यानंतर याच षटकाच्या शेवटच्या चेंडूवर कॅम्पमनला शुन्यावर बाद करत किवींना दुसरा धक्का दिला. किवींनी पॉवर प्लेमध्ये 2 बाद 47 धावा केल्या.

पाचव्या षटकात पाठोपाठ दोन विकेट्स पडल्यानंतर डेवॉन कॉन्वे आणि ग्लेन फिलिप्स यांनी किवांचा डाव सावरत तिसऱ्या विकेटसाठी 47 चेंडूत 60 धावांची भागीदारी रचली. या दोघांनी किवींचे शतक धावफलकावर लावले. अखेर ही जोडी कुलदीप यादवने फोडली. त्याने ग्लेन फिलिप्सला 17 धावांवर बाद केले. त्यानंतर डेवॉन कॉन्वेने भारताविरूद्धचा आपला दमदार फॉर्म पहिल्या टी 20 सामन्यातही कायम राखला. त्याने 35 चेंडूत 52 धावांची अर्धशतकी खेळी करत किवींना 150 च्या जवळ पोहचवले.

(Sports Latest News)

हेही वाचा : ....इथं बनतो आपला लाडका तिरंगा