मुंबई इंडियन्स आणि पंजाब किंग्ज यांच्यामध्ये काल झालेला सामना चांगलाच रंगला. मुंबई इंडियन्सला पंजाब किंग्जकडून पराभव स्विकारावा लागला. शेवटच्या क्षणी विशेष कामगिरी करता न आल्याने गेल्या तीन सामन्यात विजय मिळवणाऱ्या मुंबईला पराभवाचा सामना करावा लागला.

त्यानंतर पंजाब किंग्जने ट्वीटर हँडलवरुन मुंबई इंडियन्सची खिल्ली उडवली आहे. पंजाबने मुंबई पोलिसांना ट्वीट करत एक तक्रार केली आहे. पंजाब ज्यावेळी गोलंदाजी करत होता, त्यावेळी अर्शदीप सिंगने २० व्या षटकात स्टंप तोडून टाकला. चेंडूच्या वेगामुळे हा स्टंप तुटला. या तुटलेल्या स्टंपचा फोटो पंजाब किंग्सच्या अकाऊंटवरुन ट्वीट कऱण्यात आला आहे.

हा फोटो शेअर करताना मुंबई पोलिसांनाही टॅग करण्यात आला आहे. तसंच आम्हाला स्टंप तोडल्याची तक्रार दाखल करायची आहे, असंही म्हटलं आहे. त्यावर मुंबई पोलिसांनी भन्नाट उत्तर दिलं आहे. आपल्या ट्वीटमध्ये मुंबई पोलीस म्हणाले, "कुणी कायदा किंवा नियम मोडला असेल, तर आम्ही तक्रारीची दखल घेऊन नक्कीच कारवाई करू. पण स्टंप मोडल्यावर कारवाई करू शकत नाही. "