Neeraj Chopra Vs Arshad Nadeem : जागतिक अॅथलेटिक्स चॅम्पियनशिप 2023 मध्ये आज भारताचा पुरूष भालाफेक स्पर्धेत भारताच्या नीरज चोप्रा (88.77 मीटर), किशोर जेना (80.75 मीटर) आणि डीपी मनू (81.31) या तीनही भालाफेकपटूंनी फायनलमध्ये प्रवेश केला. (World Athletics Championships Men's Javelin Throw Final)

भारतासोबतच पाकिस्तानचा भालाफेकपटू अर्शद नदीम (86.79 मीटर) याने देखील अंतिम फेरी गाठली. तो ग्रुप B मध्ये अव्वल राहिला तर भारताचा नीरज चोप्रा हा ग्रुप A मध्ये अव्वल स्थानावर राहिला. अंतिम 12 च्या यादीत देखील नीरजच अव्वल स्थानावर राहिला.

त्यामुळे आता सुवर्ण पदकासाठी भारत आणि पाकिस्तान असा सामना रंगण्याची शक्यता आहे. पुरूष भालाफेकचा अंतिम सामना हा 27 ऑगस्टला रात्री 11 वाजून 45 मिनिटांनी सुरू होईल. ( India Vs Pakistan)

नीरज चोप्राची 88.77 मीटर ही हंगामातील सर्वोत्तम कामगिरी ठरली. तसेच तो पहिल्या प्रयत्नातच जागतिक अॅथलेटिक्स अजिंक्यपद पुरूष भालाफेकीच्या फायलनसाठी पात्र झाला. याबरोबर तो पॅरिस ऑलिम्पिकसाठी देखील पात्र झाला. ऑलिम्पिक पात्रतेसाठी 85.50 मीटर भालाफेक करणे गरजेचे होते. पाकिस्तानचा नदीम देखील 86.79 मीटर भाला फेकत पॅरिस ऑलम्पिकसाठी पात्र झाला आहे. याचा अर्थ पॅरिस ऑलिम्पिकमध्ये देखील भारत - पाकिस्तान द्वंद्व रंगणार हे नक्की.

ग्रुप A नंतर ग्रुप B ची पात्रता फेरी पार पडली. या पात्रता फेरीत पाकिस्तानच्या अर्शद नदीमने 86.79 मीटर लांब भालाफेक करत यादीत पहिले स्थान पटकवले. तो आणि वडेलिच देखील अंतिम फेरीसाठी थेट पात्र झाले. वडेलिचने 83.50 मीटर लांब भाला फेकला.

या ग्रुपमधील भारताचा भालाफेकपटून किशोर जेनाने 80.75 मीटर लांब भाला फेकला. तो फायनलसाठीच्या अंतिम 12 खेळाडूंच्या यादीत नवव्या स्थानवर राहिला. तर ग्रुप A मधील भारतीय खेळाडू डीपी मनूने 81.31 मीटर भाला फेक करत फायनलच्या 12 जणांच्या यादीत सहावे स्थान पटकावले.

(Sports Latest News)