नवी दिल्ली : आमच्या आंदोलनात काही जण उपस्थित राहत आहेत त्यांच्या हेतूमुळे हे आंदोलन वेगळ्या दिशेला जात आहे, असे वक्तव्य धरणे आंदोलन करत असलेल्या कुस्तीपटूंतील बजरंग पुनिया याने केले, परंतु या व्यक्ती कोण हे मात्र स्पष्ट केले नाही.

आमच्या आंदोलनाचे व्यासपीठ राजकीय फायद्यासाठी कोणाला करू देणार नाही, असे सांगून बजरंग पुनिया पुढे म्हणतो, काही जणांमुळे आमच्या आंदोलनाला वेगळी दिशा मिळत आहे. ही लढाई देशाच्या मुलींना सन्मान मिळण्यासाठी आहे. आंदोलनाचा फायदा कोण घेत आहे या प्रश्नावर मात्र बजरंगने मौन बाळगले.

आंदोलनात बाहेरचे अनेक जण जंतरमंतर येथे उपस्थित राहत आहेत आणि त्यातील काही जण पंतप्रधान नरेंद्र मोदी यांच्याविरोधात आक्षेपार्ह विधान करत आहेत. त्या लोकांबाबत बजरंग आक्षेप घेत असल्याचे सांगण्यात येत आहे.

आंदोलनाच्या जागेवर असेही काही लोक येत आहेत, जे आमच्या विरोधात घोषणा देत आहेत, परंतु आम्ही भारतीय कुस्ती वाचवण्यासाठी लढा देत आहोत; तर काही लोक राजकीय फायदा घेत आहेत, असे सांगून बजरंग पुढे म्हणाला, राजकाण दुय्यम आहेत, महिला खेळाडूंचा सन्मान हा आमच्यासाठी महत्त्वाचा आहे, त्यामुळे या आंदोलनात राजकारण आणू नका, हा खेळाडूंचा लढा आहे, तो खेळाडूंसाठी राहु द्या.

आंदोलनाला सर्वांनी पाठिंबा द्यावा, अशी मागणी बजरंग आणि इतर कुस्तीपटूंनी केली होती. त्यानंतर काँग्रेस पक्षाच्या नेत्या प्रियांका गांधी, भूपिंदर सिंग हुडा, दिल्लीचे मुख्यमंत्री अरविंद केजरीवाल, जयंत चौधरी, जम्मू-काश्मीरचे माजी राज्यपाल सत्य पाल मलिक आदी राजकीय व्यक्तींनी आंदोलनात उपस्थिती लावलेली आहे.