इंडियन वेल्स : जागतिक क्रमवारीत दुसऱ्या क्रमांकावर असलेल्या नोवाक जोकोविचने बीएनपी पारिबास व मियामी खुल्या टेनिस स्पर्धेतून माघार घेतल्याची पुष्टी बुधवारी आयोजकांनी केली. ‘‘अमेरिकेतील आरोग्य यंत्रणांनी नियम बदलणार नसल्याचे स्पष्ट केले आहे, त्यामुळे मी तिथे खेळू शकणार नाही.’’ असे, २०-वेळचा ‘ग्रँड स्लॅम’ चॅम्पियन असणाऱ्या जोकोविचने बुधवारी ट्विट करत म्हटले होते. जानेवारीमध्ये ऑस्ट्रेलियन खुल्या टेनिस स्पर्धेत लसीकरण न करता आपल्या विजेतेपदाचा बचाव करण्यासाठी गेलेल्या जोकोविचची ऑस्ट्रेलियन सरकारकडून हकालपट्टी करण्यात आली होती.

त्यामुळे राफेल नदालने मिळालेल्या संधीचा फायदा घेत, त्याच्या विक्रमी ‘ग्रँड स्लॅम’ जेतेपदाला गवसणी घातली. परिणामतः जोकोविचची एटीपी जागतिक क्रमवारीत दुसऱ्या स्थानावर घसरण झाली तर डॅनिल मेदवेदेव अव्वल ठरला.

‘‘मला स्वयंचलितपणे बीएनपी पारिबास ओपन व मियामी ओपनमध्ये ड्रॉ मिळाला होता; परंतु अमेरिकन सरकारचे आरोग्याबाबतचे नियम कायम असताना मी या स्पर्धेमध्ये खेळू शकणार नाही. या स्पर्धांमध्ये खेळणाऱ्या सर्वांना शुभेच्छा,’’ असे ट्विटमध्ये जोकोविचने पुढे म्हटले आहे.

जोकोविचने माघार घेतल्यामुळे ग्रिगोर दिमित्रोव्ह आता ३३ वा मानांकित होईल आणि जोकोविचचे स्थान ड्रॉमध्ये शेवटच्या ओळीत जाईल.

‘बीएनपी पारिबास ओपन’ पात्रता स्पर्धेची अंतिम फेरी बुधवारी खेळली जात आहे, तर कॅलिफोर्नियाच्या वाळवंटात गुरुवारी वर्षातील पहिल्या ‘एटीपी मास्टर्स १०००’ ची स्पर्धा असणाऱ्या मियामी ओपन स्पर्धेच्या मुख्य स्पर्धेला सुरुवात होईल.