नवी दिल्ली : ऑलिम्पिक पदक विजेती लोव्हलिना बोरगोहैनने (Lovlina Borgohain) मानसिक छळाचा (Mental Harassment) आरोप केला आहे. तिने तिचा राष्ट्रकुल स्पर्धेसाठीचा सराव राष्ट्रकुल स्पर्धा सुरू होण्यापूर्वी आठ दिवस आधीच बंद केल्याचे सांगितले.

लोव्हलिनाने सोशल मीडियावर एक वक्तव्य प्रसिद्ध केले. ती म्हणते की, 'आज मला खूप दुःख झाले आहे. माझा छळ होत आहे. ज्या प्रशिक्षकांनी मला ऑलिम्पिक पदक जिंकण्यास मदत केली त्यांना सारखे सारखे काढून टाकत माझ्या सरावात अडथळे निर्माण केले जात आहेत.याद्वारे माझी छळवणूक सुरू आहे.'

लोव्हलिना पुढे म्हणाली की, 'या प्रशिक्षकांपैकी एक संध्या गुरूंगजी यांना द्रोणाचार्य पुरस्कार देखील मिळाला आहे. माझ्या दोन्ही प्रशिक्षकांना सराव शिबिरात बऱ्याच जणांचे पाय पकडल्यानंतर सामिल करून घेण्यात आले. मला या सरावात खूप अडचणींचा सामना करावा लागला. यामुळे मानसिक छळ तर होतोच. संध्या यांना राष्ट्रकुल स्पर्धेच्या ठिकाणी देखील प्रवेश मिळत नाहीये. त्यांना माघारी पाठवण्यात आले आहे. मी विनंती करून देखील हे झाले आहे.'

लोव्हलिनने खेळातील राजकारणावर देखील निशाना साधला. ती आपल्या पोस्टमध्ये म्हणते, 'कळत नाहीये की मी खेळावर कसे लक्ष केंद्रीत करू. या राजकारणामुळेच माझी गेली वर्ल्ड चॅम्पियनशिप देखील खराब गेली होती. या राजकारणामुळे आता मला राष्ट्रकुल स्पर्धा देखील खराब करायची नाहीये. राजकारणाला छेद देत मी माझ्या देशासाठी पदक जिंकेन अशी आशा आहे जय हिंद.'