World Wrestling Championship : जगातील मानाच्या स्पर्धेत भारताची मान अभिमानाने उंचावणाऱ्या आणखी एका पैलवानाने जागतिक अजिंक्य कुस्ती स्पर्धेतून माघार घेतलीये. कांस्य पदक विजेत्या बजरंग पुनिया पाठोपाठ ऑलिम्पिक स्पर्धेत चंदेरी कामगिरी करणाऱ्या रवी दाहियाने (ravi dahiya) स्पर्धेत खेळणार नसल्याचे स्पष्ट केले आहे.

पुढील आठवड्यापासून रेसलिंग फेडरेशन ऑफ इंडियाच्या ट्रायल्स सुरु होणार आहेत. यात सहभागी होण्यासाठी पुरेसा वेळ न मिळाल्याने दाहियाने स्पर्धेतून माघार घेण्याचा निर्णय घेतलाय. ट्रायल्सची सुरुवात मंगळवारपासून होणार असून ही स्पर्धा नॉर्वेतील ओस्लो येथे 2 ऑक्टोबरपासून पार पडणार आहे.

या निर्णयासंदर्भात दहियाने म्हटले आहे की, कोणत्याही तयारीशिवाय मला मॅटवर उतरायचे नाही. सराव न करता आखाड्यात उतरण्याला काहीच उपयोग नसतो. त्यामुळेच मी स्पर्धेत न खेळण्याचा निर्णय घेतलाय. दाहियाने स्पर्धेतून माघार घेतली असली तरी डब्ल्यूएफआयने आयोजित केलेल्या ट्रायल्ससंदर्भात त्याने समाधान व्यक्त केले आहे. त्यांच्या बाजूने त्यांनी योग्य निर्णय घेतलाय, असे मत त्याने व्यक्त केले.

ऑलिम्पिक स्पर्धेत कांस्य पदकाची कमाई करणाऱ्या बजरंग पुनियाने देखील जागतिक अजिंक्य स्पर्धेत खेळणार नसल्याचे स्पष्ट केले आहे. गुडघ्याला झालेल्या दुखापतीमुळे त्याला विश्रांतीचा सल्ला देण्यात आला आहे. त्यामुळे तो स्पर्धेला मुकणार असल्याचे आधीच समोर आले होते. त्यानंतर आता ऑलिम्पिक रौप्य पदक विजेता रवि दाहिया देखील स्पर्धेत उतरणार नसल्याचे समोर आले आहे.