Pakistan Cricket Board : रमीझ राजा यांच्या जागी नजम सेठी (Najam Sethi) यांची पीसीबीचे नवे अध्यक्ष म्हणून नियुक्ती करण्याच्या निर्णयाला पाकिस्तानचे पंतप्रधान शेहबाज शरीफ यांनी मान्यता दिली आहे. रमीझ राजा 2021मध्ये पीसीबीचे प्रमुख झाले होते. नजम सेठी यांनी यापूर्वीच पाकिस्तान क्रिकेट बोर्डाचे अध्यक्षपद स्वीकारले आहे.

जिओ न्यूजच्या वृत्तानुसार, पंतप्रधान शेहबाज शरीफ यांनी नजम सेठी यांची पाकिस्तान क्रिकेट बोर्डाच्या (PCB) अध्यक्षपदी नियुक्ती आणि सध्याचे रमीझ राजा यांना हटवण्यास मंजुरी दिली आहे. पंतप्रधान कार्यालय लवकरच या नियुक्तीबाबत अधिसूचना जारी करेल. 2018 च्या सार्वत्रिक निवडणुकीत इम्रान खानच्या पक्षाने बहुमत मिळविले तेव्हा नजम सेठी यांनी पीसीबी अध्यक्षपदाचा राजीनामा दिला. पाकिस्तानचा माजी कर्णधार आणि 1992 च्या विश्वचषक विजेत्या संघाचे सदस्य रमीझ राजा यांची गेल्या वर्षी सप्टेंबरमध्ये 3 वर्षांच्या कालावधीसाठी PCB चे 36 वे अध्यक्ष म्हणून एकमताने निवड झाली होती.

आशिया कप 2023 पाकिस्तानात होणार आहे. तेव्हा बीसीसीआयचे सचिव जय शाह यांनी आशिया चषक तटस्थ ठिकाणी होणार असल्याचे सांगितले होते. पण यानंतर रमीझ राजाने धमकीचे विधान केले की जर टीम इंडिया पाकिस्तान आशिया चषक खेळण्यासाठी आली नाही तर पाकिस्तानही वनडे वर्ल्ड कपमध्ये भाग घेण्यासाठी भारतात जाणार नाही. मात्र आता खुद्द रमीझ राजा यांनाही खुर्ची वाचवता आलेली नाही.