पॅरिस : पॅरिस ऑलिंपिक महिला बॉक्सिंग लिंग वाद प्रकरणी सहानुभूती व्यक्त करताना बंदी असलेल्या आंतरराष्ट्रीय बॉक्सिंग संघटनेने (आयबीए) जाहीर केलेले रोख रकमेचे बक्षीस स्वीकारण्यास इटलियन बॉक्सिंग महासंघाने नकार दिला आहे.

अल्जेरियाच्या इमाने खलिफ हिच्याविरुद्ध फक्त ४६ सेकंदात रडत लढत सोडलेली अँजेला कारिनी हिला ५०,००० डॉलर्सचे बक्षीस आपली संघटना देऊ इच्छिते, असे आयबीए अध्यक्ष उमर क्रेमलेव यांनी जाहीर केले होते. शिवाय त्यांनी इटलीच्या राष्ट्रीय महासंघाला आणि कारिनीच्या प्रशिक्षकास प्रत्येकी २५,००० डॉलर्सचा पुरस्कार देण्याचा हेतू असल्याचे सांगितले होते.

क्रेमलेव यांच्या ऑफरसंदर्भात इटालियन बॉक्सिंग महासंघाने एक निवेदन प्रसिद्धीला देत, कोणत्याही प्रकारचे रोख पारितोषिक स्वीकारण्याबाबतच्या काही माध्यमांतील वृत्त नाकारले. कारिनी किंवा तिचा प्रशिक्षक यांचे रोख रक्कम स्वीकारण्याबाबत नियोजन आहे का याबाबत इटालियन महासंघाने स्पष्ट केलेले नाही.

इटालियन बॉक्सिंग महासंघ आयबीए किंवा प्रमुख पश्चिमी हौशी बॉक्सिंग महासंघाचे सदस्य नाही. बॉक्सिंगमधील नवी नियमन संस्था वर्ल्ड बॉक्सिंगच्या स्थापनेत गेल्या दोन वर्षांत सुमारे तीन डझन महासंघांनी आयबीए सोडलेली आहे. पुढील ऑलिंपिकमध्ये वर्ल्ड बॉक्सिंगला बंदी असलेल्या आयबीएचे स्थान मिळण्याचे संकेत आहेत.

टोकियो ऑलिंपिकपूर्वी आंतरराष्ट्रीय ऑलिपिक कमिटीने (आयओसी) आयबीएला निलंबित केले होते. त्यानंतर गतवर्षी पूर्णपणे बंदी लादली. लिंग वाद प्रकरणी क्रेमलेव यांनी आंतरराष्ट्रीय ऑलिंपिक कमिटीवर सलगपणे जहाल टीका केली आहे.

आयबीएच्या दाव्यानुसार, गतवर्षीच्या जागतिक स्पर्धेत खलिफ लिंग पात्रता चाचणीत अपयशी ठरली होती. पॅरिस ऑलिंपिकमधील महिला बॉक्सिंगमध्ये खलिफ आणि तैवानची लिन यू-टिंग यांच्या सहभागावरून जगभरातून टीका झालेली आहे. खलिफ व लिन यांनी ऑलिंपिक पात्रतेसाठी आवश्यक निकष पूर्ण केल्याचे आयओसीने सातत्याने सांगितले आहे. नवी दिल्लीत गतवर्षी अपात्र घोषित करण्यापूर्वी दोन्ही बॉक्सर आयबीएच्या स्पर्धांत कित्येक वर्षे भाग घेत होते.