Paris Olympic 2024 Lakshya Sen : मनु भाकरच्या दोन कांस्यपदकानंतर नेमबाज स्वप्नील कुसळे याने आणखी एका पदकाची आशा निर्माण केली आहे. महाराष्ट्राच्या खेळाडूने ५० मीटर रायफल थ्री पोझिशन प्रकाराच्या फायनलमध्ये प्रवेश केला. यानंतर बॅडमिंटन कोर्टवर लक्ष्य सेनचा अविश्वसनीय खेळ पाहायला मिळाला. बिगरमानांकित लक्ष्यने त्याच्यासमोर येणाऱ्या प्रत्येक तगड्या प्रतिस्पर्धीला तो सहज चितपट करत आहे. पण, बुधवारी त्याने तिसऱ्या मानांकित आमि जागतिक क्रमवारीत चौथ्या स्थानावर असलेल्या जॉनथन ख्रिस्टी याला पराभवाचा धक्का दिला.

पहिल्या सेटमध्ये २-८ अशा पिछाडीवर असलेला लक्ष्य न खचता मोठ्या धैर्याने प्रतिस्पर्धीचा मुकाबला करताना दिसला. अविश्वसनीय बचाव अन् तितकाच कौशल्यपूर्ण आक्रमण... याच्या जोरावर लक्ष्यने जॉनथनला सैरभैर केले. पहिला सेट २१-१८ असा जिंकून त्याने सामन्यावर पकड घेतली. पण, तरीही तो निर्धास्त झाला नाही, त्याचे ध्येय हे विजय मिळवणे हेच होते आणि त्यासाठी त्याने इंडोनेशियाच्या खेळाडूला संघर्ष करण्यास भाग पाडले.

लक्ष्यने मारलेला बॅकहँड परतीचा फटका सध्या चर्चेचा विषय ठरताना दिसतोय... हा फटका त्याच्या विजयावर शिक्कामोर्तब करणारा ठरला. त्याने दुसऱ्या सेटमध्ये २१-१२ अशी बाजी मारताना उप उपांत्यपूर्व फेरीत प्रवेश केला आणि त्याच्यासमोर भारताच्या एचएस प्रणॉयचे आव्हान असण्याची दाट शक्यता आहे.

दरम्यान, महिला एकेरीत पी व्ही सिंधूने इस्टानियाच्या क्रिस्टीन कुबाचा २१-५ व २१-१० असा सहज पराभव केला.

लक्ष्य सेन कोण?

लक्ष्य सेन याचा जन्म हा उत्तराखंड येथील अलमोडा गावातला. त्याचे वडील डी.के.सेन बॅडमिंटन प्रशिक्षक असून भाऊ चिराग सेन हा सुद्धा बॅडमिंटनपटू आहे. लक्ष्य फेब्रुवारी २०१७ मध्ये बी.डब्ल्यू.एफ.जागतिक ज्युनिअर रँकिंगमध्ये एकेरी खेळाडूंमध्ये पहिल्या स्थानावर आला. २०१८ मधील आशियायी कनिष्ठ अजिंक्यपद स्पर्धेत अव्वल सीडेड कुनालावूत विदितसर्नला हरवून लक्ष्यने विजेतेपद पटकावले.