माजी फलंदाज रमीझ राजा यांना पाकिस्तान क्रिकेट बोर्डाच्या (PCB) अध्यक्षपदावरून हटवण्यात आल्यापासून ते नवनवीन खुलासे करत आहेत. रमीझ राजा यांनी आता आणखी एक खुलासा केला आहे. पीसीबीमध्ये असताना त्यांना जीवे मारण्याच्या धमक्या आल्या होत्या. असा नवा खुलासा त्यांनी यावेळी केला आहे. (PCB chief Ramiz Raja uses bulletproof vehicle owing to security threat )

पीसीबीमध्ये असताना त्यांना जीवे मारण्याच्या धमक्या आल्या होत्या आणि तेव्हापासून ते बुलेट प्रूफ कार वापरत होते. असं रमीझ राजा यांनी म्हटलं आहे.

जीव वाचवण्यासाठी करोडोंच्या कार खरेदी केल्या

रमीझ राजा पीसीबीचे अध्यक्ष असताना त्यांनी 1.65 कोटींची कार खरेदी केली होती. या प्रकरणी त्याला विचारले असता, सम टीव्हीशी बोलताना राजा म्हणाले,“ती गाडी पीसीबीकडे आहे. मी ते विकत घेतले नाही. माझ्यानंतर जे आले आहेत ते देखील वापरू शकतात. मला जीवे मारण्याच्या धमक्या आल्या होत्या. तुम्हाला जीवे मारण्याच्या धमक्या मिळाल्याशिवाय तुम्ही बुलेट प्रूफ कार खरेदी करू शकत नाही. म्हणूनच मी ही कार घेतली आहे."

तसेच, “मी याबद्दल अधिक माहिती मी देऊ शकत नाही. पण हा प्रकार मार्च-2022 मध्ये पाकिस्तान आणि ऑस्ट्रेलिया यांच्यात खेळल्या गेलेल्या मालिकेदरम्यान घडला. डीआयजी साहब माझ्या घरी आले होते आणि त्याच्या तपशीलावरून अहवाल तयार केला होता.

पाकिस्तान सरकारने राजा यांना पीसीबीच्या अध्यक्षपदावरून हटवले आणि त्यांच्या जागी नजम सेठी यांची नियुक्ती केली. सेठी यांनी पदाची सूत्रे हाती घेताना अनेक बदल केले होते.