Prakhar Chaturvedi News : बीसीसीआय अंडर-19 कूचबिहार ट्रॉफीच्या अंतिम फेरीत कर्नाटकच्या फलंदाजाने इतिहास रचला. मुंबईविरुद्ध खेळताना कर्नाटकचा फलंदाज प्रखर चतुर्वेदीने नाबाद 404 धावा केल्या. या खेळीमुळे प्रखरने वेस्ट इंडिजचा माजी कर्णधार ब्रायन लाराच्या विश्वविक्रमाची बरोबरी केली आहे.

भारतीय क्रिकेट नियामक मंडळाच्या (BCCI) कूचबिहार ट्रॉफीच्या अंडर-19 देशांतर्गत स्पर्धेचा अंतिम सामना सोमवार 15 जानेवारी रोजी कर्नाटकातील केएससीए मैदानावर आयोजित करण्यात आला होता. प्रथम फलंदाजी करताना मुंबईने पहिल्या डावात 380 धावा केल्या. आयुष महात्रेने 145 धावांची शानदार खेळी केली. तर आयुष सचिनने 73 धावांचे योगदान दिले. हार्दिक राजने चार विकेट घेतल्या होत्या.

380 धावांच्या प्रत्युत्तरात कर्नाटक संघाने दमदार सुरुवात केली. सलामीवीर प्रखर चतुर्वेदी आणि कार्तिक एस. यूने पहिल्या विकेटसाठी 109 धावांची भागीदारी केली. कार्तिक 50 धावा करून बाद झाला. एका टोकाला असलेल्या प्रखारने हर्षिल धर्मानी (169) सोबत भागीदारी करत संघाची धावसंख्या 400 पर्यंत नेली.

प्रखर शेवटपर्यंत नाबाद राहिला आणि त्याने 404 धावांची खेळी खेळली. प्रखरने आपल्या डावात 637 चेंडूंचा सामना केला आणि 46 चौकार आणि 3 षटकार मारले. कर्नाटकने 890 धावा करून डाव घोषित केला.

वेस्ट इंडिजचा माजी कर्णधार ब्रायन लाराने 2005 मध्ये इंग्लंडविरुद्ध 400 धावा केल्या होत्या. आंतरराष्ट्रीय क्रिकेटमध्ये अशी कामगिरी करणारा तो जगातील एकमेव फलंदाज आहे. याशिवाय 1994 मध्ये काउंटी चॅम्पियनशिपमध्ये वॉर्विकशायरकडून खेळताना डरहमविरुद्ध नाबाद 501 धावा केल्या होत्या. आता भारतीय देशांतर्गत क्रिकेटमध्ये प्रखर चतुर्वेदीने एका डावात 400 धावा करून ब्रायन लाराच्या पराक्रमाची पुनरावृत्ती केली आहे.