कोलकाता : सूर्यांश शेडगे, शिवम दुबे, तनुष कोटियन यांच्या दमदार अर्धशतकांच्या जोरावर मुंबईने पहिल्या डावात ४१२ धावा तडकावल्या. याला प्रत्युत्तर देणाऱ्या बंगालचा पहिला डाव १९९ धावांवर आटोपला. रणजी क्रिकेट करंडकातील ब गटातील लढतीत दुसऱ्या दिवसअखेरीस मुंबई संघाने वर्चस्व कायम राखले. आता त्यांच्याकडे २१३ धावांची आघाडी आहे.

मुंबईच्या संघाने ६ बाद ३३० या धावसंख्येवरून शनिवारी पुढे खेळायला सुरुवात केली. तनुष कोटियन व अथर्व अंकोलेकर या जोडीने सातव्या विकेटसाठी ११५ धावांची भागीदारी करताना बंगालच्या गोलंदाजांचे आव्हान लीलया परतवून लावले. मोहम्मद कैफने अथर्वला ४६ धावांवर बाद करीत जोडी तोडली. तनुष याने ९ चौकार व १ षटकारासह ६७ धावांची खेळी केली. सूरज जयस्वालच्या गोलंदाजीवर तो बाद झाला. मुंबईने पहिल्या डावात ४१२ धावा फटकावल्या.

संक्षिप्त धावफलक :मुंबई - पहिला डाव ४१२ धावा (सूर्यांश शेडगे ७१, शिवम दुबे ७२, तनुष कोटियन ६७, अथर्व अंकोलेकर ४६, रॉयस्टन डियास नाबाद ४६, सूरज जयस्वाल ६/१२४) वि. बंगाल - पहिला डाव सर्व बाद १९९ (अनुस्तुप मजुमदार नाबाद १०८, मोहित अवस्थी ३/६३).

अनुस्तुपची शतकी खेळी

बंगालच्या फलंदाजांना पहिल्या डावात ठसा उमटवता आला नाही; पण अनुस्तुप मजुमदार याने १२७ चेंडूंमध्ये १२ चौकार व ३ षटकारांसह नाबाद १०८ धावांची खेळी साकारली. त्याला इतर फलंदाजांची साथ लाभली नाही. बंगालला पहिल्या डावात १९९ धावाच करता आल्या. मोहित अवस्थीने ६३ धावा देत तीन फलंदाज बाद केले. रॉयस्टन डियास व शिवम दुबे यांनी प्रत्येकी दोन फलंदाज बाद केले. या लढतीचे दोन दिवस अद्याप बाकी आहेत.