Ranji Trophy Ruturaj Gaikwad : ऋतुराज गायकवाडचा शानदार फॉर्म रणजी करंडकातील तमिळनाडूविरुद्धच्या लढतीत कायम राहिला; मात्र त्याचे द्विशतक अवघ्या पाच धावांनी हुकले. त्याने १९५ धावांची देदीप्यमान खेळी साकारल्यामुळे महाराष्ट्राला एलिटमधील ब गटाच्या लढतीत पहिल्या डावात ४४६ धावा फटकावता आल्या. तमिळनाडूने दुसऱ्या दिवसअखेरीस ४ बाद २६७ धावा केल्या असून आता त्यांचा संघ १७९ धावांनी पिछाडीवर आहे.

महाराष्ट्राने ६ बाद ३५० या धावसंख्येवरून गुरुवारी पुढे खेळायला सुरुवात केली. संदीप वॉरियरने अझीम काझीला ८८ धावांवर बाद केले. त्यानंतर ऋतुराजने एकाकी किल्ला लढवला. त्याने तळाच्या फलंदाजांना हाताशी घेऊन महाराष्ट्राला सन्मानजनक धावसंख्या उभारून दिली.

ऋतुराजने १८४ चेंडूंमध्ये २४ चौकार व ८ षटकारांसह १९५ धावांची छान खेळी केली. तो द्विशतक झळकावणार असे वाटत असतानाच अश्‍विन क्रीस्टच्या गोलंदाजीवर तो नारायण जगदीशनकरवी झेलबाद झाला. तमिळनाडूकडून संदीप वॉरियरने १०५ धावा देत तीन फलंदाज बाद केले.

महाराष्ट्राचा पहिला डाव आटोपल्यानंतर तमिळनाडूने दुसऱ्या दिवसअखेरीस ४ बाद २६७ धावा केल्या. नारायण जगदीशन याने ११ चौकार व १ षटकारासह ७७ धावांची खेळी केली. बाबा इंद्रजीत ४७ धावांवर बाद झाला. आता प्रदोश पॉल १० चौकारांसह ७४ धावांवर; तर विजय शंकर पाच चौकारांसह ४१ धावांवर खेळत आहे.